Doen vir ander alles wat julle graag wil hê hulle vir julle sal doen. Dit is die kern van die wet en die profete. (Matteus 7:12)
Mense sê soms dat alle godsdienste dieselfde is, want hulle almal bevat die sogenaamde goue reël: Behandel ander mense soos jy self behandel wil word. Dis ’n groot verbetering op die ysterreël, naamlik die sterkste een wen, of slaan voor jy geslaan word, oftewel die wet van die oerwoud. Jesus maak die goue reël hier nog meer goud, naamlik dat ek inisiatief moet neem en éérste iets goeds doen. Dan kan daar dalk ’n kettingreaksie plaasvind van vriendelikheid in ’n hele samelewing. Jesus maak dit beslis anders as ’n besigheidstransaksie (Ek gee jou iets goeds en verwag nou iets terug). Jesus vra dat ons sal gee sonder die waarborg vir terugkry, want dis om goed te doen uit jou eie geaardheid en beginsels. Uiteindelik gee Hy vir ons die diamantreël: Julle moet julle vyande liefhê. Dis hier waar Jesus se boodskap duidelik anders is as enige ander godsdiens.
Nou die moeilike vraag: Kry jy die goue reël reg? Hoe dikwels kry jy dit reg om eerste iets goeds te doen of te sê? Hoe vervang jy die ysterreël van slaan-eerste-voor-hy-slaan met goud?
Onderstreep gerus Matteus 7:12 in jou Bybel.