Foto: Pixabay.com
Lees 1 Korintiërs 1:18-31
Wat vir die wêreld die onsin van God is, is groter wysheid as die wysheid van mense, en wat vir die wêreld die swakheid van God is, is groter krag as die krag van mense. (1 Korintiërs 1:25)
Dit is dus amptelik: Die Christelike godsdiens is vol teenstrydighede. Met een enkele sin bevestig Paulus dit: onsin teenoor wysheid; swakheid versus krag; die wêreld-en-sy-mense teen God.
Die Christelike boodskap voldoen ook nie aan alle verwagtings nie. Die Jode wil eers wonderwerke sien; die Grieke dring daarop aan om te verstaan. En al wat Paulus hulle kan bied, is die vreemde prentjie van ’n Man aan ’n kruis. Wat geen wonderwerk verrig deur Homself daar af te help nie. Wie se weerloosheid onbegryplik is.
Nee, nie Jood óf Griek vind hierby aanklank nie.
Trouens, weinig geleerdes of invloedrykes of mense met aansien het hulle hier tuis gevind (vgl. v. 26). Die aanhangers van die Christelike godsdiens het in daardie beginjare dus hoofsaaklik uit ’n klompie beroepsverloorders bestaan. Niks en niemand om oor huis toe te skryf nie.
Paulus skryf hier wel twee woorde neer, elkeen meer as een keer, wat sake in ’n effens ander perspektief plaas: “geroep” (v. 24, 26) en “uitgekies” (v. 27, 28). Met God die een wat dit alles doen. Dit is Hy, bevestig Paulus, wat mense geroep en uitgekies het om te glo.
Hoe bevoorreg is die geroepenes nie, en hoe begenadig die uit- verkorenes! Hulle hoef aan geen kwalifikasie te voldoen en geen wet na te kom nie. Hulle is wie en wat hulle is omdat God hulle gebring het tot waar hulle is. Dit is Hy wat die antwoord op daardie ewige raaisel oor die sin van die lewe in hul skoot laat val het.
U roep en kies toe ook vir mý, van almal. Prys die Heer!
Die Christelike geloof is die énigste geloof waar die mens geen teenprestasie hoef te lewer nie, maar alleen moet glo! Genade onbeskryflik groot!
Dankie Here vir genade onbeskryflik groot….elke belofte is geldig want U is nie mens sodat U kan lieg nie…Amen
Amen