Die Here verwag van julle om reg te laat geskied, om liefde en trou te bewys, en om nederig voor God te lewe. (Miga 6:8)
Ons sien almal so uit na ’n uitkomkans aan die einde van die jaar. Na ’n tyd van moontlik saamwees met familie. En dan … krap ons aan mekaar, irriteer ons mekaar … kom daar weer ou koeie uit die slote aangestap om ons beplande vredevolle saamweestyd stukkend te trap. As jy in so ’n situasie is, bid dan vandag hierdie gebed:
Vrede-God, ons sukkel so om regtig u soort vrede onder mekaar te leef. Kom asseblief ons swakheid te hulp.
Ja, Heer, ek smag na u vrede. Na u soort diep vrede wat alle verstand te bowe gaan. Plant vandag hierdie vrede in my hart sodat ek sal wees wat U vra. U volgeling wat geroep is om vredeliewend op te tree teenoor vriend en vyand. Help my vandag om woede met sagmoedigheid te oorwin. Selfsug met vrygewigheid en vergunning. Help my om ’n vredemaker te wees wat brûe bou tussen mense. Ek wil doen wat U van my vra. Soos U dit vra. Solank U dit vra. Omdat U dit vra. Veral in hierdie dae!
Here, ek wíl u liefde en vrede wéés. Help my asseblief!