Dit is geen geheim nie dat indien my bankbalans so groot was soos my liefde vir Porsche, dat daar ʼn paar van hulle in my oprit sou staan. Die model wat dié handelsmerk los hande gered het, is die Cayenne. Ek dink selfs Porsche het die sukses van dié model onderskat toe hy aanvanklik gesê het hy gaan ʼn sportnutsvoertuig bou. Porsche het teen 2020 reeds een miljoen Cayennes vervaardig!
Sonder om doekies om te draai – die eerste Cayenne was bitter lelik. Óf ons het aan die idee van ʼn Porsche‑sportnutsvoertuig gewoond geraak, óf die ontwerpers het nuwe brille gekry want die jongste Cayenne is pragtig. Ek hou nie van die hoofligte nie – dit lyk asof dit van die ou Citroën DS kom – die vorige Cayenne se hoofligte was vir my baie mooier, maar dis egter wat agter die hoofligte sit wat alles weer in die wêreld goed maak – ʼn bomklapper van ʼn V8.
Eers die binneruim. Ek skat Porsche is tans boaan die leer wat materiale en bougehalte van ʼn binneruim betref. Dit is eenvoudig perfek weens die feit dat elke Porsche‑model, hetsy 911, Boxster, Cayman, Cayenne, Taycan, Macan of Panamera, eenders voel. As jy geblinddoek agter die stuur van ʼn Porsche sit, ruik en voel hulle almal dieselfde. Dis fantasties.
Wat spesifikasie betref, is daar geen speelding wat die Cayenne S nie het nie. Outomatiese klimaatbeheer, aanpasbare spoedkontrole, ʼn asemrowende Bose-klankstelsel – én natuurlik daai pragtige gebrul van die V8. Ek moet een spesifieke funksie uitlig: die aanpasbare helderligte. Ek het met die Cayenne in Hoopstad in die Vrystaat vir ʼn matriekafskeid gaan ry. Ons het 12:00 in Johannesburg weggespring en 15:00 in Hoopstad aangekom. Ek is weer 19:00 daar weg en het 22:30 by my huis stilgehou.
Die aanpasbare helderligte het fantasties gewerk om geen voertuie van voor te verblind nie, maar wat hy ook gedoen het terwyl ek ʼn ewe haastige Defender gevolg het, is om presies die blokkie tussen ons, net so breed soos die pad, uiters helder te maak. Indien ek my rigtingwyser aangeskakel het, links of regs, dan maak hy daai blokkie presies die baan voor jou en die baan waarin jy gaan skuif. As jy klaar geskuif het, word die helder blokkie weer net die een baan. Dis mal hoe dinamies dit is.
Dit bring my terug by die lieflike V8: 349 kW en 600 Nm, 0‑100 km/h in 4,7 sekondes en 273 km/h voluit. Dit is syfers wat nie lank gelede nie net in supermotors te vinde was. Met die pad Hoopstad toe, het ons dit rustig gevat en 9,8 ℓ/100 km oor die 348 km gekry… werklik goed. Die terugtog huis toe is teen ʼn vinniger tempo gehandhaaf en die verbruik was 13,7 ℓ/ 100 km – nie sleg nie as jy dink ʼn Ford Raptor met minder krag sukkel om naby daai syfers te kom.
Op die pad toer die Cayenne lieflik. Die vering toor met ʼn ondeunde pad. Dit is vir my verstommend hoe die Cayenne só soepel kan ry, maar sodra jy die Sport Plus-rymodus kies, is die padhouvermoë beter as wat enige SNV die reg het om te bied.
Porsche bou tans asemrowende motors. Die terugkeer van die V8 is fantasties en die nuwe Cayenne het beslis meer karakter as die vorige V6. Indien jy in die mark is vir ʼn SNV in dié prysklas, toetsbestuur beslis ʼn Cayenne, maar neem die tjekboek saam want jy gaan beslis met een huis toe gaan.
Die reeks lyk só:
Porsche Cayenne | 260 kW/500 Nm | 9,2 ℓ/100 km | R1 848 000 |
Porsche Cayenne Coupé | 260 kW/500 Nm | 9,4 ℓ/100 km | R1 933 000 |
Porsche Cayenne S | 349 kW/600 Nm | 9,7 ℓ/100 km | R2 125 000 |
Porsche Cayenne e-hybrid | 346e kW/650e Nm | 2,4 ℓ/100 km | R2 194 000 |
Porsche Cayenne S Coupé | 349 kW/600 Nm | 9,7 ℓ/100 km | R2 232 000 |
Porsche Cayenne e-hybrid Coupé | 346e kW/650e Nm | 2,5 ℓ/100 km | R2 259 000 |
Porsche Cayenne turbo GT | 485 kW/850 Nm | 11,9 ℓ/100 km | R4 128 000 |
Die reeks word gedek deur ʼn 2 jaar/onbeperkte km‑waarborg en 3 jaar/100 000 km‑ omvattende instandhoudingsplan.
Die kompetisie lyk só:
BMW X6 M60i | 390 kW/750 Nm | 11,9 ℓ/100 km | 2 jaar/onbeperkte km‑waarborg 5 jaar/100 000 km‑ omvattende instandhoudingsplan | R2 176 413 |
Jaguar F-Pace SVR | 405 kW/700 Nm | 11,7 ℓ/100 km | 5 jaar/100 000 km‑waarborg en omvattende instandhoudingsplan | R2 197 400 |
Mercedes-AMG GLE53 4Matic+ Coupé | 320 kW/760e Nm | 10,3 ℓ/100 km | 2 jaar/onbeperkte km‑waarborg 5 jaar/100 000 km‑ omvattende instandhoudingsplan | R2 546 798 |
Range Rover Sport P460e Dynamic HSE | 338 kW/550 Nm | 16 ℓ/100 km | 5 jaar/100 000 km‑waarborg en omvattende instandhoudingsplan | R2 745 600 |
Maserati Levante Modena | 316 kW/580 Nm | 12,1 ℓ/100 km | 3 jaar/onbeperkte km‑waarborg 5 jaar/100 000 km‑diensplan | R3 090 000 |
Tussen al die mededingers kies ek die Cayenne, en as ek ʼn enorme boot wil sleep en toegang tot laestrek wil hê, die Range Rover.
Baie van ons spartel deesdae om petrol vir so enetjie te koop.
Wie kan nog in hierdie tye so kar bekostig?
but why??