Hope vuil klere in die huis. (Foto: Verskaf)
ʼn Ma (21) en pa (38) van Klerksdorp in Noordwes, wat van kindermishandeling en verkragting beskuldig word, sal Kersfees agter tralies deurbring.
Die ouerpaar se borgtogaansoek is Dinsdag in die landdroshof in Klerksdorp aangehoor en van die hand gewys.
Albei het aangevoer dit sal in die belang van reg en geregtigheid wees om op borgtog vrygelaat te word en het aangedui dat hulle R1 000 vir borgtog kan bekostig.
Die hof het hul aansoek geweier weens die ernstige aard van verwaarlosing waarin hul drie kinders aangetref is.
Henry Mamothame, woordvoerder vir die Nasionale Vervolgingsgesag (NVG) in Noordwes, sê die ouers sal weer volgende jaar in die hof verskyn. “Die saak is uitgestel vir verdere ondersoek.”
Unchain Our Children, die liefdadigheidsorganisasie wat gehelp het om die drie sibbe te red, het die hof se besluit verwelkom. Vrywilligers van die organisasie het van die kinders se beweerde omstandighede te hore gekom en die owerhede ontbied.
Die kinders, twee sussies van onderskeidelik nege maande en drie jaar oud, en hul tweejarige boetie, is in ʼn plek van veiligheid geplaas. Die huis, in die Dawkinsville-woongebied, was glo vuil en vervalle met weinig kos vir die kinders. Hulle was na bewering onversorg en bedek in hul eie ontlasting.
Klagte word ook ondersoek of die twee sussies moontlik verkrag is.
-
- Daar was skaars kos in die huis. (Foto: Verskaf)
-
- Weinig tot min kos, asook kos wat gevrot het, is al wat in die yskas was. (Foto: Verskaf)
