Nuuskommentaar: Trump (nie heeltemal) vry, Ramaphosa al meer onder skoot

Pres. Donald Trump. Foto: AP Photo/Evan Vucci

Terwyl pres. Donald Trump algaande meer en meer bewys dat sy gewildheid min of meer immuun is teen die strome kritiek, en nou waarskynlik die Mueller-verslag ook sal oorleef, lyk dit asof pres. Cyril Ramaphosa al hoe kwesbaarder raak en dat die veldtog om vir Cyril te stem (en nie vir die ANC nie), se wiele gaan afval soos die Ramaforie na die laaste vestings terugval. 

Trump 

Die Mueller-ondersoek wat die helfte van die Trump se eerste termyn as president’n blok aan sy been was, kon geen bewyse vind dat Trump, of iemand van sy verkiesingspan met Rusland saamgewerk het om die verkiesing in Trump se guns te bewimpel nie. In die verslag se samevatting aan die kongres is nietemin ook bevind dat Trump nie volkome vrygespreek kan word nie. Geen bewyse vir dwarsboming van die gereg kon egter ook nie gevind word nie.

Volgens mediaberigte bestaan daar steeds ’n moontlikheid dat Trump in ’n staat van beskuldiging gestel kan word, en dat baie van die Demokrate hul messe hiervoor slyp.

Die Amerikaanse intelligensiedienste het reeds bevind dat Rusland, deur sy propagandadienste en die internet, by die Amerikaanse presidentsverkiesing ingemeng het. Altesaam 34 mense, waarvan ses voormalige medewerkers van Trump se verkiesingsveldtog was, is reeds in verband met die Russiese inmenging aangekla.

Min van dit wat in die opsomming staan, het nog as verrassing gekom. Byna alles was reeds bekend en sommige lede van die media het al besonder akkurate berigte geplaas wat die bevindings haarfyn uiteengesit het.

Trump self het gewag tot die opsomming formeel bekend gemaak is, en dadelik getwiet: “No Collusion, No Obstruction, Complete and Total EXONERATION. KEEP AMERICA GREAT!” Dit strook egter nie met Mueller se bevinding dat hy Trump ook nie kon vryspreek nie.

De Standaard, ʼn Belgiese dagblad, beskryf die teenstrydigheid soos volg: “Volgens die samenvatting heeft het team van Mueller geen conclusies getrokken over de vraag of Trump de rechtsgang onwettig heeft belemmerd. Minister van Justitie Bill Barr en onderminister van Justitie Rod Rosenstein besluiten in die samenvatting dat de onderzoekers onvoldoende bewijs hebben gevonden voor die belemmering, maar dat ze Trump er evenmin van kunnen vrijpleiten.” (Mueller se ondersoekspan kon nie genoegsame bewyse van belemmering teen Trump vind nie, maar hulle kon net so min bevind dat Trump hom nié aan dwarsboming skuldig gemaak het nie.)

Dit is duidelik dat dit nog nie die einde van die sage is nie. ’n Boek oor die inhoud van die ondersoek word binnekort verwag.

Intussen gaan daar nou hewige debatte volg oor presies hoeveel van Mueller se bevindinge openbaar gemaak sal kan word. Die Demokrate wil “so veel as moontlik” laat openbaar maak.

Die groot vraag is nou hoe die kiesers op die verslag gaan reageer. Onlangse peilings toon dat Trump se gewildheid selfs toegeneem het, en selfs aan die hoogtepunt van sy gewildheid begin raak-raak het, juis toe verskeie faktore saamgespeel het wat ander presidente sou knou. Hieronder tel die samesprekings met Noord-Korea se Kim Jong-oen wat ontspoor het, rekordgetalle Amerikaners wat meen hulle word te swaar belas en die VSA se handelstekort wat nuwe rekordvlakke begin toets het.

Pres. Cyril Ramaphosa (Foto: GCIS)

Ramaphosa

Met net meer as ’n maand oor voor die algemene verkiesing word die krane van kritiek teen pres. Cyril Ramaphosa behoorlik oopgedraai. Bygesê, Ramaphosa maak grootliks daarna.

Veral sy hantering van die Eskom-sage laat sy reputasie nie onaangeraak nie. Al hoe meer kritici wys daarop dat Ramaphosa self ’n groot aandeel in Eskom en ander semi-staatsinstellings se rampspoedige verloop het. Ramaphosa was in 2014 as hoof aangestel van ’n span wat Eskom, die SAL en die Poskantoor moes regruk, en hy was sedertdien in beheer van Eskom se “oorlogskamer”.  Dit lyk minstens of Ramaphosa in hierdie taak vas aan die slaap moes wees.

Dit blyk ook dat daar groot weerstandigheid en verontwaardiging is oor Ramaphosa se stelling dat “ons almal” verantwoordelik is vir die Eskom-probleem.

Dit is darem te goedkoop verkiesingspropaganda om sy eie, en die ANC se hantering van Eskom te “versag” deur slagoffers saam op die skuld-brood te smeer.

Vanoggend roep ’n koor van opskrifte uit dat Ramaphosa voete van klei het, soos Ramaphosa se hande wat ook nie skoon is nie, en Ramaphosa wat lieg oor die Wes-Kaap se behuisingstoelaag.

Haas elke dag is daar iewers nog ’n aanslag wat die aanvanklike Ramaforie meer en meer duike laat opdoen.

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Nuuskommentaar

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Werner

Ja die feit dat Trump onskuldig bevind is is seker n lekker bitter pil vir die liberale media om te sluk

Fifi

Hy is maar n ou kalant wat ander voor die trein gooi vir eie gewin

ne

Glans duur nie vir ewig nie, veral as daar skelm streke by is nie!

At Dippenaar

Cyriltjie moet maar sy tassies pak.

Nel

Hy is beslis vas aan die slaap. Hy skrik net so dan en wakker en is dan vreeslik geskok oor alles wat om hom aangaan…