3 met kookwater, strykyster gebrand in aanval

Argieffoto: Maroela Media

Die Gautengse polisie is op die spoor van vier verdagtes wat na bewering die naweek drie lede van ʼn familie op ’n plaas in die Hekpoort-omgewing oorval, aangerand en met kookwater en ’n strykyster gebrand het.

Konst. Gloria Maswanganye, woordvoerder van die polisie, het aan Maroela Media gesê die voorval het Vrydag omstreeks 22:30 op ’n plaas naby die R24 plaasgevind.

Volgens Maswanganye het ʼn egpaar in hul slaapkamer gelê en slaap toe hulle honde hoor blaf en die vier mans by hul slaapkamer sien inloop het. Die mans het toe vuurwapens en ʼn mes op die egpaar gerig en op die sleutels van ʼn kluis en kontant aangedring.

Luidens inligting ontvang deur Oostermoed-beskermingsdienste het die mans deur ʼn venster toegang tot die huis verkry.

Die egpaar is gedwing om op die vloer te lê en die man (62) het aan die verdagtes verduidelik dat daar nie ’n kluis of kontant in die huis is nie.

Een van die verdagtes het die man met ’n moersleutel bygedam en toe hom, sy vrou asook sy swaer wat ten tyde van die aanval ook in die huis was, met ’n strykyster en kookwater gebrand.

“Die verdagtes het die slagoffers vasgebind en die huis geplunder. Hulle het twee vuurwapens, juwele, selfone, ’n televisiestel, ʼn rekenaar, ʼn skootrekenaar, ʼn Playstation, kos en klere gesteel en toe te voet van die toneel gevlug,” het Maswanganye in ’n verklaring gesê.

Hoewel die mans omstreeks 01:00 op die vlug geslaan het, het die slagoffers hulself tot omstreeks 06:00 in ʼn kamer toegesluit voordat hulle hulp by ʼn nabygeleë huis ontbied het. Die slagoffers is deur ʼn plaaslike dokter ondersoek en een van hulle is na ʼn hospitaal geneem met ernstige brandwonde.

Maswanganye wou op navraag nie die slagoffers aan Maroela Media identifiseer nie.

Die polisie doen ʼn beroep om die publiek om met enige inligting na vore te kom wat tot die vervolging van die verdagtes kan lei. Die polisie het gevra dat die publiek nie self die verdagtes nader nie aangesien hulle swaar gewapen is.

Die polisie ondersoek ʼn saak van huisroof.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
Wurmpie

Ek het nie woorde nie.

Erika

Moet altyd in ‘n span kom mense aanval, want hulle is te lafhardig en bang om alleen te kom. Hoop hulle word gevang!

Yankee

Dan se ek weer. Geweld sekerlik in enige Land. Die in Suid-Afrika egter, van so n aard, nerens maar nerens in enige ander beskaafde Land!!

Marisca

‘n Saak van huisroof?????? Rerig

toy

Mens kan amper nie dink ‘n mens kan so wreed wees nie.