Ace raadpleeg regspan, lasbrief verwelkom

Ace Magashule, sekretaris-generaal van die ANC (Foto: Simphiwe Mbokazi/African News Agency/ANA)

Ace Magashule, sekretaris-generaal van die ANC, gaan sy regspan raadpleeg nadat dit Dinsdag bekend geword het dat ’n lasbrief vir sy inhegtenisneming uitgereik is.

Pule Mabe, woordvoerder van die ANC, sê Magashule het reeds sy regspan versoek om die geldigheid van die inhegtenisneming by die betrokke owerhede vas te stel.

“Die sekretaris-generaal het by meer as een geleentheid gesê hy sal sy samewerking verleen in enige proses wat deur wetstoepassingsagentskappe onderneem word.

“Die ANC sal hierdie verwikkelinge noukeurig dophou en dienooreenkomstig verslag lewer, sou dit nodig wees.”

Hoewel Magashule nog nie in hegtenis geneem is nie, is ’n lasbrief onderteken vir aanklagte van korrupsie wat met die asbes-saak verband hou. Die lasbrief word vanuit verskeie oorde verwelkom.

Volgens John Steenhuisen, DA-leier, het Leona Kleynhans, DA-lid van die Vrystaatse provinsiale wetgewer, die saak vanaf 2015 onverpoos voortgesit waarna sy in Mei strafregtelike klagte teen Magashule ingedien het.

“Die [lasbrief] is ’n oorwinning vir die DA, maar belangriker, dit is ’n oorwinning vir Suid-Afrika.”

Steenhuisen sê verder dit is hoog tyd dat korrupte ANC-kaders die volle mag van die wet die hoof moet bied en tronkstraf opgelê word, sou hulle skuldig wees aan korrupsie.

“Dit beteken die wiele van geregtigheid draai, hoewel baie stadig,” meen dr. Pieter Groenewald, leier van die VF Plus, op sy beurt.

“Ondervinding het nogtans geleer dat wanneer die eerste domino in ’n ry val, die ander vinnig daarna volg.”

Die burgerregteorganisasie AfriForum het aangedui dat sy privaat vervolgingseenheid die saak sal monitor. “Ons hoop dat die vervolging van Magashule geregtigheid sal laat geskied en daarom sal die privaat vervolgingseenheid die saak ook nougeset volg,” sê Kallie Kriel, uitvoerende hoof van AfriForum.

Maroela Media het vroeër berig Magashule word ondersoek vir sy beweerde rol in die toekenning van ʼn R255 miljoen-kontrak om ʼn oudit van asbesdakke in die Vrystaat te doen. Die tender is tydens Magashule se termyn as Vrystaatse premier toegeken, maar dit is glo op bedrieglike en korrupte wyse gedoen. Dit was bedoel om asbesdakke in die Vrystaat te identifiseer en te verwyder, maar die nodige omsigtigheidsproses is nie gevolg nie.

Die omstrede sakeman Edwin Sodi en verskeie ander vermeende betrokkenes is reeds in verband met die kontrak in hegtenis geneem. Sodi se Blackhead Consulting en oorlede Igo Mpambani se Diamond Hill Trading 74 het die kontrak in 2014 losgeslaan.

Magashule sal na verwagting Vrydag in die Bloemfonteinse landdroshof op die aanklagte teen hom verskyn.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Joos

Dit sal nou interesant wees om te sien hoe hy gaan beskerm word deur sy kaders in die sisteem

Sarel

Uitstel op uitstel tot daar niks van kom nie , of hy gaan een of ander siekte opdoen.

Yvonne

Kan maar net toekyk en sien wat gaan gebeur

Snowball

Ek hoop dis dieselfde regspan wat Pieter-Louis Myburgh oor sy boek sou aanvat….. Ace, ek sien tralies in jou toekoms…

Strandloper

Man, man kan nie wag vir sy foto waar hy deur tralies loer nie!