AfriForum wil hinderlae op hoofweë help bekamp

Ysterpenne op paaie. (Foto: Gautengse verkeerspolisie)

AfriForum sê sy buurtwagte in en om Pretoria is daartoe verbind om die ernstige toename in hinderlae op veral hoofweë in die omgewing te bekamp. Dit sluit in boewe se gebruik van skerp ysterpenne om motoriste voor te lê.

Maroela Media het verlede week berig ʼn man is op die N4 by Donkerhoek in Pretoria doodgesteek toe hy ʼn motorband langs die pad omgeruil het. Hy het kort tevore oor ʼn skerp voorwerp in die pad gery.

Jacques Broodryk, AfriForum se woordvoerder vir gemeenskapsveiligheid, sê dié burgerlike ingryping vorm deel van AfriForum se breër veldtog “om die misdadige bloedvergieting wat opportunistiese misdadigers en moontlik selfs ook georganiseerde groepe op ons paaie uitvoer”, hok te slaan.

“Hierdie modus operandi word by die dag meer algemeen en verskeie ernstige voorvalle is die afgelope paar weke aangemeld.

“Selfs ambulanse en voertuie van die Tshwane-metropolisie (TMPD) het al die slagoffers van dié aanvalle geword,” sê Broodryk.

Hy sê gedeeltes van die N1 in die noordelike dele van Pretoria, asook die R80 en die N4 in die noordelike dele en in die ooste van Pretoria, is reeds berug vir hierdie soort lokvalle.

“Daarbenewens is ander paaie soos Garsfontein- en De Villebois Mareuil-weg ook as lokvalbrandpunte geïdentifiseer.”

AfriForum se buurtwagte in die Pretoria-omgewing het hulle nou daartoe verbind om die misdaadbrandpunte waar hierdie hinderlae op hoofweë gereeld voorkom, by hul patrollieroetes in te sluit.

“AfriForum-buurtwag sal bedag wees op enige verdagte items op dié roetes en gemeenskapslede bystaan wat moontlik bystand in dié verband nodig het.”

Broodryk sê die gebruik van skerpgemaakte ysterpenne om voertuie te beskadig en motoriste sodoende tot stilstand te dwing om hulle aan te val, is voorheen meer gereeld op agterpaaie en stil roetes aangeteken.

“Misdadigers het egter nou begin om hierdie tegniek ook op besiger paaie te gebruik, hoewel dit dikwels in stiller tye van die dag – en veral deur die nag – uitgevoer word.

“AfriForum doen ’n beroep op plaaslike gemeenskapspolisiëringsforums (GPF) en ander gemeenskapsveiligheidstrukture om saam met AfriForum te werk om hierdie soort misdaad te bekamp.”

Broodryk sê motoriste kan die volgende riglyne in gedagte hou:

• Moet onder géén omstandighede stilhou ná ’n voorval waar die voertuig se bande, voorruit of onderdele beskadig is nie. Ry sover moontlik totdat jy ’n veilige bestemming bereik het.
• Kontak dadelik jou plaaslike buurtwag, sekuriteitsmaatskappy of nooddiens en stel hulle in kennis van die voorval. Gee volledige besonderhede rakende die voorwerp wat in die lokval gebruik is en verskaf die adres of ligging daarvan. Dit sal aanvalle op motoriste wat moontlik ná jou op dieselfde manier geteiken word, kan voorkom.
• Maak seker jou selfoon is gelaai voor jy in die pad val.
• Deel jou ligging met geliefdes, veral wanneer jy alleen reis.
• Wees paraat en kom in die gewoonte om verder in die pad te kyk om sodoende enige bedreigings, vreemde voorwerpe of mense langs die pad betyds raak te sien.
• Stoor nooddienste, die buurtwag of jou sekuriteitsmaatskappy se kontaknommer op jou foon.
• Oorweeg dit om ’n nooddiens-app, soos die AfriForum 911-paniekknoppie-app, op jou foon te installeer. Dié app is gratis beskikbaar op Google Play Store (vir Android-toestelle) en die App Store (vir iOS-toestelle).