AfriForum wil Ramaphosa kruisondervra oor kaderontplooiing

Pres. Cyril Ramaphosa tydens die lewering van sy staatsrede. (Foto: Elmond Jiyane/GCIS)

Die burgerregteorganisasie AfriForum het Maandag ’n formele aansoek by die Zondo-kommissie oor staatskaping ingedien ingevolge waarvan ’n bevinding gevra word dat pres. Cyril Ramaphosa gedagvaar word om voor die kommissie te verskyn.

AfriForum vra spesifiek dat pres. Ramaphosa oor die ANC se kaderontplooiingsbeleid ondervra word en versoek ook dat die organisasie die geleentheid gegun word om voorleggings in dié verband aan die kommissie te lewer en self ook die president te kruisondervra.

Die aansoek spruit uit die feit dat pres. Ramaphosa van 2013 tot 2016 die voorsitter van die ANC se komitee oor kaderontplooiing was. Gedurende hierdie tyd is verskeie individue wat tans van korrupsie en staatskaping beskuldig word, op grond van hulle lojaliteit teenoor die ANC in sleutelposisies aangestel.

Ernst Roets, hoof van beleid en aksie by AfriForum, verduidelik dat die ANC se kaderontplooiingsbeleid waarskynlik die grootste bydraende faktor tot korrupsie en staatskaping is.

“Die ANC is uitgesproke oor sy benadering dat lojaliteit aan die party ’n bepalende faktor is wanneer dit by aanstellings in sleutelposisies in die regering kom,” het Roets gesê. “Dit dra oënskynlik selfs meer gewig as meriete en die vermoë om die werk te doen. Waaroor daar egter geheimsinnigheid heers, is presies wat hierdie komitee se doen en late is, asook watter individue op grond van hulle lojaliteit aan die party in sleutelposisies aangestel is.”

Roets voeg by dat hierdie beleid nie slegs oor ontplooiings in sleutelposisies gaan nie, maar ook oor die herontplooiing van partylojaliste.

Individue met betrekking tot wie AfriForum vrae aan pres. Ramaphosa wil stel, sluit die volgende in: Brian Molefe, Dudu Myeni, Pravin Gordhan, Lucky Montana, Jeff Radebe, Joseph Phungula, Sifiso Buthelezi, Thuli Madonsela, Kady Muteba, Patello Lebbaka, Francois van Eeden, Lynette Brown, Nicholas Linnel, Nhlanhla Nene en Modise Motloba.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
SomeOne

daar moet sommer oor alle regerings lede vrae gevra word

JM

Kaderontplooiing is die groot oorsaak van die land se ondergang. Ramaphosa moet EERLIK verduidelik!

zonstar

Tsa! Vat hom!

Persheks Adri

Hier kort BAIE name op die lys! So te sê die hele verdomde lot van hulle… Wonder of hy sal opdaag om te antwoord mmmmm

Johann

Onaantasbaar….onverandwoordbaar. Blatante vergryper saam met sy kaders.