ANC boos oor inbraak by nuwe skool

Menzi Primary School. Foto: Gautengse regering

Die ANC in Gauteng veroordeel die inbraak by ʼn splinternuwe skool in Brakpan en die diefstal van ʼn magdom rekenaartoerusting ten sterkste.

Die Gautengse onderwysdepartement het Dinsdag in ʼn verklaring gesê hy het met “skok en teleurstelling” kennis geneem van die inbraak in die vroeë oggendure by die Menzi Primary School, ʼn tegnologies gevorderde megaskool wat onlangs teen R100 miljoen opgerig is.

Die skool is ʼn week gelede aan die gemeenskap van die township Tsakane oorhandig, maar Dinsdagoggend vroeg is twee veiligheidswagte wat die perseel gepatrolleer het, vasgebind en in ʼn pakkamer toegesluit. Daarna kon die inbrekers by die hoofingang inkom en van daar toegang tot die skool verkry.

Die toerusting wat gesteel is, sluit 185 tablette vir leerders, agt skootrekenaars vir onderwysers, twee dataprojektors, drie lessenaarrekenaars, ʼn plasma-TV, kleinkaskontant van minder as R500 en ʼn digitale video-opnemer in.

Panyaza Lesufi, Gauteng se LUR vir onderwys, het in die sosiale media onder skoot gekom nadat hy gedreig het om alle oorblywende toerusting by die skool weg te neem as die gemeenskap nie self die verdagtes opspoor en aan die polisie uitlewer nie.

Deur die skool te besteel, het die booswigte duidelik oorlog teen die hele samelewing verklaar.

Die ANC, waarvan Lesufi ʼn lid is, doen egter ʼn beroep op die polisie om die inbrekers so gou moontlik aan te keer en die toerusting terug te kry, berig African News Agency.

“Deur die skool te besteel, het die booswigte duidelik oorlog teen die hele samelewing verklaar,” sê die party in ʼn verklaring. “Ons kan nie toelaat dat misdadigers ons kinders se reg op gehalte-onderwys ondermyn nie.”

Die party doen ʼn beroep op elke burger, veral die inwoners van Tsakane en omliggende gemeenskappe, om wetstoepassers met inligting te help sodat hulle die oortreders gou kan aankeer.

“Menzi Primary School is een van ʼn nuwe geslag skole wat die ANC-beheerde regering in Gauteng elke maand open met die doelwit om te verseker dat ons kinders toegang kry tot die beste moontlike geriewe,” sê die regerende party.

Baie openbare geld is in dié bate belê.

Volgens die party baan dié tegnologies gevorderde skole ʼn nuwe weg in onderwys wat uiters belangrik is om die nalatenskap van substandaardonderwys en -leergeriewe uit die apartheidsera vir swart kinders reg te stel.

“Dis elke inwoner se plig om jaloers oor geriewe soos dié van Menzi Primary School te waak,” sê die party in die verklaring. “Baie openbare geld is in dié bate belê sodat ons kinders toegang tot net die beste toerusting en omgewing kan kry.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Willna

as iets so kosbaar is, pas met dit nie met sekuriteit op?
vra maar net

bekruiper

Ek verstaan nie dat die anc nou kwaad is oor net een ou enkele inbraak nie.
Wat van die ander derduisende inbrake in die land…………

Cor

Nou is die ANC boos oor die inbraak by die skool, wonder ek wie se skuld is dit dat misdaad hand uitruk. Defenitief die regering se skuld wat die ANC is. Een van die boloftes wat Pres. Ramaposa n paar dae terug gemaak het was om elke leerder van n tablet te voorsien, as hierdie rekenaar toerusting nie eers veilig bewaar kon word nie hoe sal die veiligheid van die beloofde tablette gewaarborg kan word

Jacques

Is die bohaai omdat dit n swart skool is?

GM

Mens het nie ‘n kristalbal nodig om te voorspel dat dit oral gaan gebeur waar die skole opgerig gaan word nie.

Ag, en die apartheidskaart moet ook oral gespeel word. Dis nou jammer dat hul nie apartheid ook kan blameer vir die diefstal nie nè?