‘ANC moet leer om politiek uit sport te hou’

Ashwin Willemse. Foto: SuperSport

Die VF Plus het in ʼn verklaring gesê die ANC-regering se oordrewe beheptheid met ras, ook op die sportveld, is goed geïllustreer deur die minister van sport se oorhaastigheid om met die Supersport/Ashwin Willemse-voorval dadelik kant te kies en sonder meer van die voorval ʼn rasse-kwessie te maak.

“Supersport het nou self met ʼn ondersoek bevind die voorval het niks met ras te maak nie en die minste wat minister Tokozile Xasa kan doen is om aan alle Suid-Afrikaners om verskoning te vra dat sy Willemse se mede-aanbieders deur haar ondeurdagte optrede met die rassekwas bygekom het,” het Anton Alberts, woordvoerder van die VF Plus, gesê.

“Die regering se beleid oor sport is om minderheidsdeelname deur gedwonge kwotas eindelik uit te skakel en nie net te skei soos met apartheid nie. Die vorige minister (Fikile Mbalula) het nasionale sportliggame in dié verband selfs gedreig met onttrekking van akkreditasie en ʼn verbod aan internasionale deelname.

“Artikel 9(1) van Suid-Afrika se Grondwet stel almal is gelyk voor die reg. Artikel 9(2) maak voorsiening vir die regstelling van ongelykhede in ons samelewing. Daar is niks fout daarmee om ongelykhede te behandel nie, maar dit moet gedoen word deur die skep van gelyke geleenthede en nie gelykheid van uitkomste ten koste van minderhede nie.”

Alberts het verduidelik die terme “transformasie” en “demografiese verteenwoordiging” wil gelyke uitkomste verseker, en die VF Plus is van mening dit is ongrondwetlik, aangesien dit in stryd staan met artikel 9(2).

Dit kan aan die hand van ʼn Grondwethof-beslissing as volg verduidelik word:
• Transformasie vereis kwotas in die vorm van demografiese verteenwoordiging. Die Grondwethof het beslis dat ras slegs een van die faktore kan wees by regstellende aksie aanstellings.
• Die hof het ook bevind dat kwotas onwettig is.

“Indien ons kennis neem van die feit dat baie sportmanne en -vroue in diens van sportverenigings is, dan is enige optrede van die regering om kwotas af te dwing om demografies verteenwoordigend te wees, inherent ongrondwetlik.

“Ook van belang is dat artikel 9(2) diskriminasie in die vorige en huidige bestel aanspreek. Dit beteken dat enige diskriminasie deur die regering wat vandag plaasvind, ook reggestel moet word. Die implikasie is dat ‘n sportspan of sportsoort wat te veel swart deelnemers het, verander moet word om minderhede te akkommodeer. Sokker is ʼn voorbeeld waar wit, bruin en Indiërs meestal onderverteenwoordig is,” het Alberts bygevoeg.

“Die absurditeit van sosiale manipulering kan duidelik hieruit gesien word. Meriete moet die enigste maatstaf in sport wees. Persone wat om die verkeerde redes gekies word, is gedoem tot mislukking en dit is net hierdie mense en sport in sy geheel wat daaronder ly aangesien toeskouers wegbly en inkomste daal. Almal verloor in die proses.”

Alberts beveel aan dat gelyke geleenthede eerder geskep moet word. “Sportmanne wat presteer is geliefd en gewild onder alle toeskouers, ongeag hul kleur. Dit is daarom belangrik dat die regering daarop fokus om geleenthede te skep, veral in die arm gebiede waar bykans geen sportvelde of afrigters is nie. Ek het die vorige minister Fikile Mbalula gereeld gevra waar is sy sportvelde in die minder gegoede gebiede. Wat word gedoen met die geld wat die fiskus aan sport toewys? Ek wag steeds op ʼn antwoord.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

49 Kommentare

jongste oudste gewildste
AD

Kan die minister aangevat word asb. Of gaan die Wereld maar ook meer bewus word van haar om druk op ons regering te sit. Ek dink dis n goeie idee. Altwee

TDW

Dankie VF+!! Julle slaan die spyker op sy kop.

Janneman

Afriforum, ons benodig n veldtog teen hierdie regeringsamptenare wat rassehaat aanblaas en hul bes doen om apartheid lewendig te hou.

Rabes

Die sogenaamde minister van sport is volgens my onbevoeg om daardie posisie te beklee. Ek wet julle vra ‘n paar eenvoudige vra oor sport en sy kan dit nie beantwoord nie. Hoe kan onbevoegde en onbekwame persone die poste beklee? Dit sê vir my die persoon wat hulle in die poste aangestel het is ook maar pateties.

thinus

Groot debat vanoggend op RSG oor die verkleineering van AW, na bewering die oorsaak van die spektakel. Snaaks nie een van die sprekers het enigsins verwys na swak werksprestasie nie, het hulle dit dan nêrens gehoor of gelees dat dit die eintlike rede is nie? Wel dit is ook net hoorsê – maar so ook die storie oor rassistiese meerwaardigheid.
Nou wil ek net weet, as dit waar is dat AW se werksprestasie nie na wense is nie, moet hy verskoon word op grond van sy velkleur?