Baanbreker-operasie: Babadogtertjie dalk eersdaags tuis

Die operasie wat die ses maande oue Leah-Marie van der Riet verlede week ondergaan het, was die eerste van sy soort in Suid-Afrika en volgens dokters ʼn groot sukses.

Manda van der Riet (26), Leah-Marie se ma, het aan Maroela Media gesê haar dogtertjie kan waarskynlik reeds Dinsdag huis toe gaan. “Sy is steeds in die hoësorgeenheid, maar dokters het gesê die operasie was ʼn groot sukses en sy herstel baie vinnig.”

Leah-Marie, Manda en haar man, Le Sueur (27), se eersteling, is op 15 Oktober met ʼn keisersnee in die lewe gebring. Sy is ʼn maand te vroeg gebore. “Die dokters het glad nie tydens my swangerskap opgemerk iets is fout nie. By geboorte het hulle gesien sy het nie ʼn borsbeen nie.”

Volgens Manda sou dit beteken dat Leah-Marie se belangrike organe soos haar slukderm en die hoofslagaar na haar hart beskadig kon word as sy ’n hou teen die bors sou kry aangesien daar geen been was om die organe te beskerm nie. “Die dokters was onkant betrap, want dit was die eerste geval in Suid-Afrika. Hulle het toetse gedoen om seker te maak haar asemhaling is normaal en om te bevestig dat sy wel nie ʼn borsbeen het nie. Hulle het toe gesien die been is aan die onderkant met ʼn baie klein stukkie geheg en dat die gaping in ʼn U-vorm was.”

Volgens Manda het dokters gewag tot Leah-Marie ses maande oud was om die operasie te doen ten einde te verseker dat sy sterk genoeg is. Die operasie is in die Christiaan Barnard-gedenkhospitaal in Kaapstad onder leiding van dr. Susan Vosloo gedoen. “Hulle het die beentjie aan die onderkant in ʼn V-vorm gesny en die twee gedeeltes aan elke kant na mekaar toe getrek. Hulle het ook die boonste drie ribbes aan elke kant met 5 mm elk verleng om te verhoed dat die borskas te styf is en te sorg dat daar meer spasie vir haar organe is.”

Intussen meen dokters dat Leah-Marie ʼn normale lewe sal kan lei. “Sy is ʼn regte wonderwerkie. Die dokters en fisioterapeute gaan nog in detail vir ons verduidelik hoe ons haar mag optel en hanteer aangesien haar ribbetjies nog nie geheg is nie en ons haar nie onder haar armpies mag optel vir die volgende ses weke nie. Wanneer alles eers mooi geheg is, sal dit nie meer ʼn probleem wees nie. Die Here is so goed vir ons en dit gaan baie goed met haar.”