Reddingswerkers Sondag op die toneel. (Foto: NSRI)
’n Duitse vrou (79) is oor die naweek dood toe ’n boot met haar en twee familielede op die Breederivier in die omgewing van Witsand in die Wes-Kaap omgeslaan het.
Die Nasionale Seereddingsinstituut (NSRI) sê in ’n verklaring plaaslike reddingswerkers is Sondag omstreeks 16:04 na die rivier aan die kant van Kaap Infanta ontbied nadat ’n boot met ’n egpaar van Duitsland en ’n familielid omgeslaan het.
’n Man is met reddingswerkers se aankoms op die toneel op die boot aangetref, terwyl omstanders op ’n nabygeleë strand reeds ’n man en vrou te hulp gesnel het.
Luidens die verklaring is die vrou egter op die toneel dood verklaar. Die twee mans, onderskeidelik 79 en 76 jaar oud, het die voorval oorleef, maar is vir skok behandel.
Al drie slagoffers is Duitse burgers. Die vrou het ten tyde van die voorval saam met haar man by sy broer gekuier. Sy broer woon in Kaapstad en het ’n vakansiehuis in Witsand.
’n Geregtelike doodsondersoek word gedoen.
sjoe dis hartseer….