Bestuurders van twee restaurante vas oor drank  

(Argieffoto: pixabay)

Die bestuurders van twee restaurante in onderskeidelik Sandton in Johannesburg en Silverton in Pretoria is die naweek in hegtenis geneem nadat daar glo drank aan klante verkoop is.

Restaurante mag ingevolge die aangepaste vlak 3-afsonderingsregulasies nie drank verkoop nie.

Volgens kapt. Mavela Masondo, polisiewoordvoerder, het misdaadintelligensie inligting ontvang dat ʼn restaurant in Wesstraat in Sandton drank aan klante verkoop waarna polisiebeamptes Saterdag tydens ʼn klopjag op die perseel toegeslaan het.

“Die restaurant was op volle kapasiteit en daar is gevind dat alkohol openlik op die tafels bedien is en dat gesondheidsprotokolle nie nagekom word nie.”

Twee van die restaurant se bestuurders is in hegtenis geneem en daarvan aangekla dat hulle die Rampbestuurwet oortree het. Daar is op alkohol ter waarde van R600 000 beslag gelê.

Intussen was die polisie in Silverton, in die ooste van Pretoria, Vrydagaand ná die aandklokreël van 21:00 met roetinepatrollies besig toe hulle opgemerk het dat motors by ʼn gewilde franchise-restaurant geparkeer staan.

“Beamptes het ondersoek ingestel en gesien daar is sowat 11 mense wat alkohol op die perseel drink. In die stoorkamer is daar op alkohol in ysbakke afgekom wat gereed was om bedien te word. Die bestuurder is in hegtenis geneem vir die oortreding van die Wet op Rampbestuur.”

Foto: SAPD

Volgens Masondo is meer as 162 mense oor die naweek in Gauteng in hegtenis geneem omdat hulle die aandklokreël verontagsaam het terwyl 34 mense in hegtenis geneem is omdat hulle geweier het om maskers te dra nadat hulle beveel is om dit te doen.

Intussen is daar ook multidissiplinêre operasies oor groot dele van die provinsie uitgevoer. In Alexandra is 540 mense vir verskeie misdade in hegtenis geneem. “Meer as 540 mense is in Pretoria en Ekurhuleni in hegtenis geneem. In Sedibeng is 290 mense in hegtenis geneem.”

Genl.maj. Tommy Mthombeni, waarnemende provinsiale polisiekommissaris, het gesê daar is kommer oor mense wat steeds voortgaan om die regulasies te verontagsaam. “Operasies om die regulasies toe te pas sal in die provinsie verskerp word, solank mense dit nie nakom nie”, het Mthombeni gesê.

Die verdagtes wat in hegtenis geneem is sal Maandag in landdroshowe reg oor die provinsie verskyn terwyl van die verdagtes reeds op waarskuwing vrygelaat of beboet is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

33 Kommentare

jongste oudste gewildste
Pieter

Die ANC is een groot grap.

Werner

Maar taverns en nedersetting word nie aangeraak nie want die poliesie is bang vir inwoners en reels geld net vir sommige gedeeltes van die regering

Hennie J

Baie geluk hoedman, jou chronies het n geweldige deurbraak gemaak in die bekamping van misdaad in piesangland.

Okmardom

Disbelaglik. Soos ons regering.

Anel

Die mense het niemand gepla nie. Probeer kos op hulle families se tafels sit. Het ook rekeninge om te betaal. Polisie het op ‘n stadium een week aan en een week af gewerk, so twee weke uit die maand en volle salaris gekry. Hoeveel duisende mense verloor nie of het al hul werk verloor nie agv van hierdie sinnelose regulasies nie? Pleks gaan vang hulle ware kriminele. Maar nou ja, sagte teikens is mos makliker. En wst gaan met daardie R600 000.00 se drank word wat hulle vat? Ek het gedink die grondwet maak voorsiening daarvoor dat mense die reg… Lees meer »