Boer dood en broer ernstig beseer in KZN-plaasaanval

Argieffoto: Reint Dykema

Argieffoto: Reint Dykema

ʼn 56-jarige boer is dood en sy 54-jarige broer is ernstig beseer toe hulle Dinsdagaand op hul plaas in KwaZulu-Natal deur gewapende rowers oorval is.

Kol. Jay Naicker, polisiewoordvoerder, het aan Maroela Media gesê die broers is omstreeks 19:00 op hul plaas in die Nyoni-omgewing, suid van Eshowe, oorval. “Drie verdagtes met aanvalswapens het op die twee broers geskiet. Dit is nie in hierdie stadium duidelik of die broers op die plaas besig was of net tuis gekom het toe hulle oorval is nie,” het Naicker gesê.

Die ouer man is op die toneel dood, terwyl sy broer na ʼn hospitaal gehaas is. Een van die broers se vrou was ten tyde van die voorval in die huis, het Naicker gesê.

“In hierdie stadium wil dit voorkom asof twee vuurwapens gesteel is, maar dit is nog nie duidelik nie omdat polisie nog nie ʼn verklaring by die oorlewende slagoffer kon afneem nie.”

ʼn Saak van moord, poging tot moord en gewapende roof word ondersoek. Naicker het gesê die provinsiale kommissaris, lt.genl. Mmamonnye Ngobeni, het die verdagtes aangeraai om hulself aan die gereg oor te gee, aangesien die polisie alles in hul vermoë sal doen om hulle vas te trek en aan die pen te laat ry.

Die name van die slagoffers is aan Maroela Media bekend, maar kan nie bekendgemaak word totdat al hul naasbestaandes van die voorval ingelig is nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
anet

My hart gaan uit na hierdie twee broers se familie. Ek word verskriklik hartseer as ek van hierdie moorde hoor. lt.genl. Ngobeni dankie ook dat jy hierdie stelling neem dat jy hulle sal vas trek. Dit is goed om hierdie woorde te hoor en die versekering te kry dat geregtigheid sal geskied.

Vrede en berusting aan al die familie wat geraak word deur hierdie tragedie. Ek bid vir julle vertroosting in hierdie hartseer tyd.

boervrou

ek wens so di moorde kan op hou ek vrees dag en nag vir ons lewens veral my kinders

piet

Nog een, en nog een, en nog een, en nog een, en nog een, en nog een!!!!!!! As ek dit nie mis het nie is dit nou al die 3de geval in die laaste week of 2 wat ek lees van op Maroela Media! Iemand MOET die streep trek, wie gaan dit wees??????

Berhalet Beukes

Ek het al self gewonder!

Johann Coetzee

En nuus24 weier om die komentaar fisiliteit oop te maak op plaasmoord nuus. Want hulle weet… hulle weet.