Boucher reageer op aantygings

Mark Boucher. Foto: Alexander Joe/AFP.

Mark Boucher, die Protea-hoofafrigter, het op die aantygings reageer wat onlangs teen hom by Krieket Suid-Afrika (KSA) se transformasie-sittings gemaak is.

Die sittings maak deel uit van KSA se projek vir maatskaplike geregtigheid en nasiebou (SJN) en verskeie oudspelers het al voor Dumisa Ntsebeza, die transformasie-ombudsman, getuig.

Paul Adams, wat tussen 1995 en 2004 vir Suid-Afrika in 45 toetse verteenwoordig het, het onder meer getuig dat van die destydse Protea-spelers hom glo “brown sh*t” tydens boetevergaderings genoem het.

Volgens Adams was Boucher na bewering een van die spelers wat dit kwytgeraak het.

Mark Boucher en Paul Adams vier Andrew Flintoff se paaltjie. Foto: Martyn Hayhow/AFP.

“Mark was net een van die ouens en ek het eers weer later daaraan gedink. Destyds het ek dit net geniet om deel van die span te wees en ek wou op niemand se tone trap nie. Dit was eers toe my vrou my daaroor pols dat ek besef het dit was verkeerd,” het Adams gesê.

Nodeloos om te sê, kan sulke aantygings ernstige nagevolge in die Suid-Afrikaanse sportlandskap hê en sedertdien het daar ’n sosialemediastorm om die hardebaard-paaltjiewagter se kop losgebars.

Boucher het ’n verklaring uitgereik om sy standpunt te verduidelik en gesê dat hy gretig is om ’n einde aan die bespiegeling en die gepaardgaande kommentaar te maak. Hy het terselfdertyd die hoop uitgespreek dat die SJN objektiewe bevindings op grond van feitelike bewyse sal maak en nie deur die ongegronde beskuldigings beïnvloed sal word nie.

“Ek word in sekere mediaberigte en op sosiale media daarvan beskuldig dat ek ’n rassis is – ’n etiket wat byna onmoontlik is om uit te wis. Die aanval op my karakter deur hierdie mense is meedoënloos en sonder enige objektiwiteit, terwyl dit lyk asof dit deur ’n verskuilde agenda aangehits word.

“Hoewel ek naïef in my speeldae was, was niks wat ek gesê of gedoen het deur kwaadwilligheid of rassisme gemotiveer nie. Ek het myself nooit beter as enigiemand anders op grond van my velkleur geag nie,” het hy gesê.

Boucher is in Desember 2019 as die Proteas se hoofafrigter aangewys. Foto: @OfficialCSA/Twitter

Boucher meen dat hy altyd probeer het om in die beste belang van die span op te tree. Hy erken egter dat hy as jong speler dinge kon gesê en gedoen het wat sy medespelers kon kwets.

“Daarvoor vra ek opreg en sonder voorbehoud om verskoning.”

Die veteraan van amper 150 toetse was by geleentheid tydens toere kamermaats met spelers soos Makhaya Ntini en Adams en hulle het baie tyd saam deurgebring.

“Ons was spanmaats en vriende. Velkleur was nooit van belang nie en dit was ongetwyfeld nooit ’n kwessie nie.”

Hy kan dit onomwonde stel dat hy nie vir Adams daardie naam gegee het nie, maar dat die gebeure ná wedstryde soms onvanpas, onaanvaarbaar en dus – veral wanneer dit deur ’n hedendaagse lens geëvalueer word – aanstootlik kon wees.

“Ons was jonk en nie volwasse genoeg om te besef dat ons optrede aanstoot kon gee nie. Met die nodige wysheid en volwassenheid sou ons dinge beslis anders gedoen het.”

  • Boucher het in ’n internasionale loopbaan van amper 15 jaar 147 toetse vir die Proteas gespeel. As paaltjiewagter het hy 555 kolwers  (’n wêreldrekord) uitgehaal en hy word as een van die beste spelers ooit agter die paaltjies bestempel.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

38 Kommentare

jongste oudste gewildste
Pitbul

Klink my Adams soek net aandag.

Jywilwat

Is daar regtig nog mense wat krieket kyk na al die politieke gemors waarin hulle betrokke is?

Aai

Laat hulle weer coach van ander land bring dan lag ons weer lekker.

Johan

Hulle is cry babies nou nes willimse

Dries

Verewig bly hulle stil.Totdat dit die “narrative” word,dan moan hulle .Adams was anyway net daar vir sy kleur,was nooit towtsgehaltw nie.Oomblik wat kolwers opgehou betower was deur sy gogga boulaksie,was hy useless