ʼn 49-jarige buitelander is in Mpumalanga in hegtenis geneem nadat hy met R75 miljoen se dwelms betrap is.
Die Valke se narkotikaburo (Saneb) het inligting oor ʼn vragmotor wat moontlik dwelms vervoer van die polisie op Witrivier se honde-eenheid ontvang en opgevolg, sê kol. Katlego Mogale, woordvoerder van die Valke.
“Die Valke se Saneb-eenheid op Secunda het met behulp van Elukwatini se plaaslike kriminele rekordsentrum, die Elukwatini-brandweer en die Badplaas-polisie die geïdentifiseerde vragmotor voorgekeer en na die polisiestasie begelei.”
Die brandweer het gehelp om ʼn versteekte kompartement in die vragmotor oop te maak, waarna 250 sakke met 1 kg-heroïen elk ontdek is. Dit het ʼn geraamde straatwaarde van R75 miljoen, sê Mogale.
Die dwelms, wat vir die internasionale mark bestem was, kom van Mosambiek.
Die vastrek van ʼn vermeende dwelmsmous is te danke aan die samewerking van ʼn span wat Suid-Afrika se polisie en hul eweknieë in Mosambiek en Tanzanië op die been gebring het om heroïen-handel deur die streek te bekamp, sê lt.genl. Godfrey Lebeya, hoof van die Valke.
Die verdagte sal na verwagting Woensdag in die Carolina-landdroshof op aanklag van die besit van onwettige dwelms met die doel om dit te versprei, verskyn.
Mogale sê ’n ondersoek is ook van stapel gestuur om vas te stel hoe die vragmotor Suid-Afrika kon binnekom sonder om deeglik by die grens nagegaan te word.
“Die Valke se span vir ernstige georganiseerde misdaad bly daartoe verbind om die verspreiding van onwettige dwelms te ontwrig en te verseker dat diegene wat daarby betrokke is, voor stok gekry word.”
Kon nog nooit verstaan hoekom mense die goed in hulle liggaame wil sit? Ek is net te bly om nog elke more wakker te word, daai blou lig te sien en diep asem in te haal. Nou moet ek ‘n naald vat en gemors my liggaam in jaag!
Gelukkig was daar inligting, ek sidder om te dink hoeveel van die goed en wat alles nog in ons land in kom met ons hopelose grens beheer !
dit is net n druppel in die emmer.
Kyk vir die doeane beamptes wie se gesin met luukse karre rondry.
Die smokkel van heroïne van Mosambiek is niks nuuts nie. Ek glo die smokkelaar het net nie die “regte” hande geghries nie, gevolglik is hy gevang. Die dwelms gaan heel moontlik uit aanhouding “bevry” word.