DA oorweeg wantrouemosie in Baai se burgemeester

Nqaba Bhanga, Oos-Kaapse DA-leier. Foto: DA

Die DA in Nelson Mandelabaai sal na verwagting volgende maand ʼn mosie van wantroue indien in die burgemeester, Mongameli Bobani.

Dit kom ná aantygings wat in die Port Elizabethse dagblad, The Herald, gepubliseer is dat hy duisende rande ontvang het in ʼn beweerde korrupte verhouding met ʼn diensverskaffer van die Nelson Mandelabaai-munisipaliteit se geïntegreerde openbare vervoerstelsel (IPTS).

The Herald het vroeër vandeesmaand berig dat die Valke op Bobani se kantoor toegeslaan het en lêers en rekenaars verwyder het wat met ʼn ondersoek na die IPTS verband hou.

Nqaba Bhanga, Oos-Kaapse DA-leier, het gesê in ʼn beëdigde verklaring deur die Valke word verwys na beweerde korrupte optredes waarin miljarde rande verlore gegaan het.

Bhanga het gesê die finansiële stabiliteit van dié metro is in die weegskaal vandat Bobani en ʼn ANC-geleide “koalisie van korrupsie” die bewind oorgeneem het. Hy meen finansiële wanbestuur, onlangse binnegevegte en die ineenstorting van die ANC in Nelson Mandelabaai sal ʼn regstreekse finansiële uitwerking op inwoners en die metro se ekonomie hê.

“Onder die DA-beheerde koalisieregering was die munisipaliteit se invorderingskoers 98,8% vir Julie 2018. Vandat burgemeester Bobani en sy ‘koalisie van korrupsie’, bestaande uit die UDM, ANC en EFF oorgeneem het, het die invorderingskoers in September 2018 tot 78,7% gedaal.

“As dié tendens voortduur, sal die Stad waarskynlik ʼn inkomstetekort van R500 miljoen in die 2018/’19-boekjaar hê.”

Intussen het Bantu Holomisa, UDM-leier, getwiet hy het Bobani gebel, maar dié het die aantygings ontken. Holomisa sê die UDM sal met sy eie ondersoek begin nadat hy “die sogenaamde beëdigde verklaring” bekom het.