Die Vrystaatse departement van onderwys het in Augustus verlede jaar meer as R10 miljoen aan drie geleenthede ter viering van Vrouedag bestee.
Die Vrystaatse LUR vir onderwys, Makalo Mohale, het in antwoord op ʼn parlementêre vraag van die DA onthul dat sy departement ʼn totaal van R10 769 242,89 aan drie geleenthede in onderskeidelik Petrusburg, Heilbron en Bultfontein bestee het.
Die eerste geleentheid is op 19 Augustus in Petrusburg aangebied en het die departement presies R3 283 340,44 gekos. Sowat 1 300 mense het dié geleentheid by die Ipetleng Secondary School bygewoon.
MEC Mohale's Women's Day Celebration set Petrusburg on fire today❗️1200 girls were gathered from throughout the Xhariep District to ignite, empower and nurture the talents of the girl child and the mission was accomplished! pic.twitter.com/2fc0JdpsFy
— FSEducation (@FSDeptEducation) August 19, 2023
ʼn Tweede geleentheid vir sowat 1 700 mense by die Phirihadi Primary School in Heilbron op 25 Augustus het die departement ʼn paar honderd duisend rand meer (R3 740 673,95) gekos.
Nog R3 745 228,50 is eindelik bestee aan ʼn geleentheid vir sowat 1 700 mense by die Ntuthuzelo Primary School in Bultfontein op 31 Augustus.
Só lyk die departement se besteding:
Petrusburg | Heilbron | Bultfontein | Totale koste | |
Markiestent/ stoele/ dekor | R787 370,50 | R881 070,00 | R890 460,00 | R2 558 900,50 |
Geleentheidsbeplanner | R683 000,00 | R920 300,00 | R905 659,50 | R2 508 959,50 |
Vervoer & spyseniering | R940 269,94 | R916 835,95 | R908 855,00 | R2 765 960,89 |
Higiëne-pakkies | R585 200,00 | R734 968,00 | R752 754,00 | R2 072 922,00 |
Radio-uitsending: Lesedi FM | R287 500,00 | R287 500,00 | R287 500,00 | R862 500,00 |
Totale koste: | R3 283 340.44 | R3 740 673.95 | R3 745 228.50 | R10 769 242.89 |
Volgens Mohale het hierdie drie geleenthede ten doel gehad om Vrouemaand saam met hoërskoolmeisies te vier en hulle te motiveer oor die verskillende loopbaanpaaie wat hulle ná skool kan volg.
Roy Jankielsohn, die DA se premierskandidaat in die Vrystaat, wys egter daarop dat die Vrystaatse departement van onderwys ʼn swak rekord van finansiële bestuur het. “In 2022 het die department R232 666 000 se onreëlmatige uitgawes aangegaan sonder dat dissiplinêre stappe teen verantwoordelike individue geneem is.
“Die geld wat aan geleenthede van hierdie aard bestee word terwyl 62% van ons provinsie sukkel om kos op die tafel te sit, is ʼn bewys dat die ANC-bestuurde regering meer omgee vir persoonlike ego’s as honger kinders.
“Hierdie tipe uitgawes is ʼn verdere bewys dat besuinigingsmaatreëls blote retoriek is aangesien die ANC en sy makkers voortgaan om provinsiale koffers te melk voor die nasionale en provinsiale verkiesing in 2024.
Ek kan myself net indink hoeveel kruideniersware met daardie enorme bedrag geld gekoop kon word en derduisende gesinne wat honger gaan slaap, kon voed vir n baie lang tyd.
Niks word gedoen sonder n gevreet van miljoene nie…….
Kyk hoe word die geld vermors.
Alles gaan in hierdie land gaan net om vreet, sorry vir die woord, maar dis die waarheid. Almal is bekommerd oor honger mense, wees liewer bekommerd oor werklose mense. As jy werk hoef jy nie honger te ly nie. Maar luiheid is die bevolking se doodsteek.
Vandag “blink Stefaans” en more soek ons kos. Al wat tel is vandag.
Ja klomp skelm mense het weer lekker geld gemaak. Daar moet gekyk word na wie het hierdie bedrae gekwoteer.
Dit is om die minste te sê, skokkend!! Nie dat ek enigsins verbaas is nie.
Ag asseblief – hierdie dekselse vrouedag en vrouemaand is so overrated. Small things….
En dit terwyl kinders nog steeds in puttoilette verdrink. :(