Dié Afrikaanse skole vir topprestasie vereer

Die land se voorste Afrikaanse skole is Vrydag vir hul uitsonderlike prestasies in die matriekeksamen vereer. (Argieffoto: pixabay)

Die Solidariteit Skoleondersteuningsentrum (SOS) het Vrydag die land se voorste Afrikaanse skole vir hul uitsonderlike prestasies in die afgelope matriekeksamen vereer.

Die merietetoekenningsgeleentheid is by die nuwe Sol-Tech-kampus in Pretoria gehou.

Die top-20 Afrikaanse skole se 5 160 kandidate het altesaam 10 956 onderskeidings in verlede jaar se eindeksamen behaal.

Dit is meer as twee onderskeidings per kandidaat.

Die SOS sê die skole se sukses is te danke aan moedertaalonderrig én gebalanseerde kultuuroordrag wat waardes vestig wat leerders lewenslank suksesvol maak.

Die Hoërskool Waterkloof was die topskool wat onderskeidings betref en het verlede jaar net 18 meer matrieks as in 2019 gehad, hoewel die 2020-groep altesaam 298 méér onderskeidings opgelewer het: 1 021 teenoor 723 in 2019.

Chris Denysschen, hoof van die Hoërskool Waterkloof en Leon Fourie, uitvoerende hoof van die SOS. (Foto: SOS)

Chris Denysschen, die skoolhoof, skryf hul sukses toe aan die samewerking van puik personeel, leerders en die ondersteuning van familie.

“Die leerders het aan die begin van die jaar gevra: ‘Meneer, hoe kan ons van wêreldformaat wees?’ Ons kies toe die tema ‘grensloos’ en ons besluit om te droom.”

Die merietetoekenningsgeleentheid is by die nuwe Sol-Tech-kampus in Monumentpark gehou.

Die top-20 skole wat die meeste onderskeidings landwyd behaal, is:

1. Hoërskool Waterkloof
2. Hoërskool Menlopark
3. Hoërskool Garsfontein
4. Afrikaanse Hoër Meisieskool
5. Westerford High School
6. Paul Roos Gimnasium
7. Pietermaritzburg Girls’ High
8. Hoërskool Zwartkop
9. Hoërskool Stellenberg
10. Rustenburg Girls’ High School
11. Hoërskool Eldoraigne
12. Mbilwi Secondary
13. Hoër Meisieskool Bloemhof
14. Afrikaanse Hoër Seunskool
15. Bishops
16. Durban Girls’ High
17. Westville Girls’ High
18. Hoërskool Parel Vallei
19. Pretoria Boys High School
20. Hoërskool D.F. Malan

Die SOS sê enkelgeslagskole het weer koningin gekraai: Sewe van die top-20 skole in Suid-Afrika met die meeste onderskeidings per kandidaat is meisieskole.

Wilna van Heerden, hoof van die Hoër Meisieskool Bloemhof en Leon Fourie. (Foto: SOS)

Volgens Wilna van Heerden, hoof van die Hoër Meisieskool Bloemhof, het drie dinge hulle veral voorberei vir die uitdagende jaar. “Ons praat nooit oor punte of prestasie nie. Ons fokus is nie prestasie nie, ons fokus is om onsself te verbeter en om te weet wie ons is. Dít, tesame met die feit dat ons kinders ʼn uiters gesonde werksetiek het en ook daarby selfdissipline, het gemaak dat Covid-19 nie die kinders kon onderkry nie.”

Die top-20 skole met die meeste onderskeidings per kandidaat is:

1. Herschel Girls’ School
2. Herzlia High School
3. Phambili Secondary School
4. Hoër Meisieskool Bloemhof
5. Rhenish Girls’ High School
6. Westerford High School
7. Central Islamic School
8. Bishops
9. Rustenburg Girls’ High School
10. Siyabonga School
11. Star College
12. Cannons Creek School
13. Afrikaanse Hoër Meisieskool
14. Hoër Meisieskool La Rochelle
15. Al Azhar Institute
16. Springfield Convent of the Holy Rosary
17. Rondebosch Boys’ High School
18. Hoër Meisieskool Paarl
19. Hoërskool Waterkloof
20. Constantia Waldorf School

(*Skole in vetdruk is Afrikaans)