Dié toelae nie meer by Poskantoor beskikbaar

(Argieffoto)

Die Suid-Afrikaanse Poskantoor (Sapo) gaan nie meer die spesiale R350-noodtoelae wat deur die Suid-Afrikaanse Agentskap vir Maatskaplike Sekerheid (Sassa) voorsien word, uitbetaal nie.

Begunstigdes word aangeraai om dit voortaan by enige Pick n Pay-, Boxer-, Shoprite-, Checkers- en USave-winkel of kitsbanke te kry.

Volgens Johan Kruger, woordvoerder van die Poskantoor, is dié besluit geneem om lang toue en groot groepe mense by poskantore te voorkom.

Hy sê mense het ook uit hul eie begin om eerder die toelae by supermarkte af te haal waar hulle direk daarna kruideniersware kan koop. Dit spaar volgens Kruger die begunstigdes tyd en geld.

“Dit is soveel makliker vir begunstigdes om toelae by supermarkte te kry waar hulle die geld in elk geval gaan gebruik,” sê Kruger.

Volgens Kruger kan begunstigdes met ʼn bankrekening die opsie kies om toelaes sommer direk in hul bankrekeninge te laat inbetaal. Die toelae kan dan by kitsbanke in die vorm van kontant getrek word of bankkaarte kan by betaalpunte gebruik word.

Sassa se ouderdom-, ongeskiktheid- en kindertoelae word steeds by die Poskantoor uitbetaal.

Die DA is egter nie tevrede met dié besluit nie en gaan aan die minister van digitale tegnologie en kommunikasie, sowel as die minister van maatskaplike ontwikkeling, skryf om dit om te keer.

“Hierdie stap sal ongetwyfeld miljoene arm Suid-Afrikaners benadeel wat op hierdie toelae staatmaak. Hulle word nou gedwing om onnodige bykomende reisuitgawes aan te gaan om toegang tot plekke buite hul gemeenskappe te verkry om toegang tot hierdie toelae te kry,” sê Solly Malatsi, DA se skadu-minister vir kommunikasie.

Malatsi sê die lang toue by poskantoortakke is die gevolg van die entiteit se “chroniese ondoeltreffendheid”, tekort aan personeel en uitgediende tegnologiese infrastruktuur. “Hulle kan dus nie die skuld hiervoor op die begunstigdes van die R350-toelae pak nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

23 Kommentare

jongste oudste gewildste
Anel

Ek kan nie glo dat die lot wat die R350. 00 kry nod bankrekeninge het nie! Betaal hulle dan nie bankkostes nie? En wat se rekeninge het hulle? As ek ‘n rekening wil oopmaak is daar allerhande voorwaardes en dan kan ek ook nie my rekening leeg trek nie, selfs nie ‘n spaar rekening nie. Hoekom gee hulle nie vir die mense maar eerder ‘n R350. 00 koopbewys van ‘n supermark naby hulle nie? Baie meer prakties.

Sarie

Bestaan die poskantoor nog?

Karoomeisie

In die dorpie waar ek bly, is nie een van die winkels wat genoem word nie. Net ‘n poskantoor. Hoe nou gemaak?

Johan

Die geld het toe nie “opgedaag” nie.

Niel

Plaas hul die geld laat uitbetaal by drankwinkels Die meeste gaan soontoe!