Braden Cannoo. (Foto: Facebook)
Een verdagte is reeds agter tralies ná die dood van Braden Cannoo, ʼn 22-jarige kelner wat omgery is toe hy selfoondiewe agternagesit het.
Maroela Media het vroeër berig drie mans en ʼn vrou het Maandag omstreeks 19:30 die Jakes-restaurant in Steenberg Village in Tokai binnegegaan. Die vier het hulle as klante voorgedoen, maar die restaurant verlaat voordat daar vir hulle sitplek aangewys is.
Cannoo het intussen agtergekom dat een van die restaurantwerkers se selfoon gesteel is. Die drie mans het in ʼn voertuig buite die restaurant gespring en die vrou agtergelaat.
Cannoo het hulle agternagesit en op die enjinkap van die motor gespring terwyl die verdagtes weggery het. Hy is van die voertuig geslinger waarna die voertuig oor hom gery het. Hy is ook ʼn ent ver deur die motor gesleep.
Kol. Andrè Traut, polisiewoordvoerder in die Wes-Kaap, het gesê ʼn 34-jarige man is Donderdag in verband met die voorval in hegtenis geneem. Hy verskyn na verwagting Dinsdag in die Wynberg-landdroshof op ʼn klag van moord.
Die vrou is dieselfde aand vir selfoondiefstal in hegtenis geneem.
So onnodig dat hy sy lewe moes verloor, net om ‘n selfoon te herwin.
Mnr Cannoo, jy was ñ ware held. Rus in vrede, vriend. Reg en geregtigheid sal geskied.
Lewe vir ‘n Selfoon ? Wat gsan met die vrou gebeur , diefstal van selfoon?
Sterkte aan familie en vriende. Mag Reg geskied