EFF bekoor ‘agtergeblewe’ wit gemeenskap

Leiers van die Ekonomiese Vryheidsvegters (EFF) by die gemeenskap van Hermanstad, noord van Pretoria (2 Julie 2016) Foto: Jonisayi Maromo/ANA

Leiers van die Ekonomiese Vryheidsvegters (EFF) by die gemeenskap van Hermanstad, noord van Pretoria (2 Julie 2016) Foto: Jonisayi Maromo/ANA

Leiers van die Ekonomiese Vryheidsvegters (EFF) het Saterdag ʼn ekonomies benadeelde gemeenskap van Hermanstad, noord van Pretoria, bekoor met beloftes van huise en omvattende ingrypings om misdaad in die gebied te beveg.

“Ons wil die mite, dat die EFF slegs vir sekere mense bedoel is, uit die weg ruim,” het MoAfrika Mabongwana, adjunkvoorsitter van die EFF in Pretoria, gesê. “Almal van julle hier is welkom in die EFF. Die EFF is nie ʼn anti-wit organisasie nie. Die EFF wil nie die wit mense in die see in jaag nie. Ons word veroordeel omdat ons die waarheid praat.”

Die EFF is besig met sy verkiesingsveldtog voor die munisipale verkiesing op 3 Augustus.

“Omdat julle arm is, gaan die EFF julle mondstuk wees. Die EFF gaan die leiding neem vir julle eie struggle. Ons sal langs julle staan en saam met julle baklei totdat julle jul eie huise kry. As ons saam werk, is daar lig aan die einde van die tonnel. Julle sal daardie huise kry,” het hy gesê.

Mabongwana, saam met ander streeksleiers van die party, het gesê gemeenskapslede, wat al jare lank op HOP-huise wag, het hom uitgenooi. Sommige van die gemeenskapslede het HOP-huise, maar hulle is behoeftig, met briewe van die Tshwane-munisipaliteit in hierdie verband, maar sit nou opgeskeep met agterstallige water- en elektrisiteitsrekeninge. Die elektrisiteit na sommige van die huise is reeds afgesny.

“Sodra ons aan bewind kom in die Tshwane-munisipaliteit, sê ons almal wat steun op toelaes van die regering, moet nie elektrisiteit of belasting betaal nie. Die regering kan nie met die een hand vir jou daardie R1 500 gee en met die ander hand die R1 500 wegneem nie. Julle moet nie betaal nie. Julle gaan nie eiendomsbelasting of belasting betaal onder ʼn EFF-munisipaliteit nie,” het Mabongwane gesê onder luide applous van die gemeenskap.

“Die EFF-munisipaliteit sal verordeninge goedkeur wat erwe vir arm mense beskikbaar gaan maak. Dit kan nie reg wees dat ons in baie klein huisies moet bly terwyl daar oop grond naby is nie. Die munisipaliteit moet net gaan en erwe afsny en elektrisiteit en water verskaf vir arm mense.”

Mabongwana het ná die vergadering aan verslaggewers gesê die vergadering met die hoofsaaklik wit gemeenskap is nuwe grond vir die EFF. “Soos julle kan sien met die mense wat hier bymekaargekom het, moet hulle in die EFF verwelkom word. Die EFF het nou ʼn struktuur in dié wit gemeenskap, wat ongekend is. Ons wys aan alle partye dat dit moontlik is vir ons om wit mense te hê wat ons ondersteun, weens die goed waarvoor ons staan. Hierdie mense is al sedert 2005 huise beloof.”

Andries Nkome, EFF-advokaat, het met die lede van die gemeenskap vergader en aan die Tshwane-munisipaliteit geskryf en ʼn vergadering geëis oor die “afgeskeepte gemeenskap”. Die gemeenskap sukkel ook met dwelmverwante misdaad. Nkome het gesê die EFF sal Tshwane pak namens die gemeenskap.

“Dit is belangrik om te sê dat dit ʼn basiese mensereg is, volgens die Grondwet, om ʼn huis in dié land te hê. Ons het nou aan die munisipaliteit en die minister van menslike nedersettings geskryf. Ons eis ʼn vergadering namens hierdie mense. Sommige van hierdie mense bly alreeds in die huise, maar hulle wag nog dat die titelaktes afgeteken moet word en hulle ʼn reg het om in die huise te bly,” het Nkome bygevoeg.

“Die ander kwessie hou verband met die eiendomsbelasting wat hierdie mense moet betaal vir basiese dienste soos water en elektrisiteit. Die oorgrote meerderheid van hierdie mense steun op toelaes. Hulle behoort minder te betaal as wat hulle nou betaal. Een van hierdie persone skuld R80 000. Hoe kan daar van iemand, wat R1 500 verdien, verwag word om skuld van R80 000 af te betaal? Dis belaglik. Dit is onmoontlik en ons eis dat dié skulde afgeskryf word,” het Nkome verduidelik.

Inwoners het rekeninge na die vergadering gebring en ʼn beroep gedoen op die EFF om in te gryp.

“HOP-huise is vir arm mense. Waarom faktureer hulle ons dan vir meer as R1 000 vir elektrisiteit?” wou Evelyn Buyse, een van die inwoners, weet. “Ons betaal te veel vir elektrisiteit. HOP-huise is vir arm mense, nie vir die regering om ons te beneuk nie. Ons is moeg vir die regering.”

Buyse, ʼn enkelma van ses, het aan verslaggewers gesê sy betaal huur vir die HOP-huis waarin sy al 13 jaar lank bly.

Nog ʼn inwoner, Susara Coetzee, het gesê sy wag al sedert 2012 vir ʼn HOP-huis toe sy daarvoor aansoek gedoen het. Sy bly intussen saam met haar ma. “Nou is my ma te siek en ek moet na haar kyk. Ons elektrisiteit is afgesny. Ek weet nou ons hoop lê by die EFF. Hulle sal ons help,” het die ma van drie gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

136 Kommentare

jongste oudste gewildste
Stefaans

Om te sê ek is EFFens pessimisties, is ‘n eufemisme

ElgeraineR

Ai tog

Hennie

Politieke praatjies wat soos mis voor die son sal verdwyn!

Dawie

Ek hoop hierdie hoop wat weer per mond belowe word is opreg en nie net n werwing vir stemme uir desperaatheid nie.SA se politici is mos maar net manne vol beloftes en dis waar dit eindig.

Elsie

Ek kan nie glo dat die mense alles glo wat die EFF hulle belowe nie Het hulle al klaar vergeet dat die EFF by hulle openbare by eenkomste aangehits word om plase en grond te beset en dat hulle dit verniet kan vat Die ANC het ook al daardie dinge belowe en niks het nog waar geword nie Hoekom teiken hulle nou bejaardes