EFF vra swaar vonnis vir Coligny-moordbeskuldigdes

EFF-ondersteuners in die Noordwes-hooggeregshof. Foto: ANA

EFF-ondersteuners wat Maandagoggend die twee voorste banke van die Noordwes-hooggeregshof vol gepak het, dring daarop aan dat Pieter Doorewaard (27) en Phillip Schutte (34) lank in die tronk moet sit.

Die vonnisverrigtinge in die saak teen Doorewaard en Schutte begin vandag nadat hulle in Oktober verlede jaar skuldig bevind is aan die moord op die 16-jarige Matlhomola Mosweu.

“Ons doen ʼn beroep op die hof om geregtigheid vir Matlhomola Mosweu te laat geskied deur hulle elkeen 15 jaar tronkstraf op te lê. Ons soek niks minder as 15 jaar nie,” het Dintwe Mekgwe, EFF-streeksekretaris, gesê.

Daar was ook ʼn oproer in die openbare galery nadat ʼn joernalis ʼn foto van die EFF-ondersteuners wou neem terwyl daar gewag is vir die hofverrigtinge om te begin. “Jy is nie een van ons nie. Neem die wittes agter ons af, nie ons nie. Vee daai foto uit, vee dit uit,” het ʼn vrou dreigend aan die joernalis gesê.

EFF-ondersteuners in die Noordwes-hooggeregshof. Foto: ANA

ʼn Veiligheidsbeampte het die ondersteuners tot orde geroep waarna lede van die polisie se eenheid vir openbare orde na die hof ontbied is.

Die vonnisverrigtinge gaan vandag voort ondanks die feit dat die enigste ooggetuie in die saak teen Doorewaard en Schutte, Bonakele Pakisi, na bewering erken het hy het gelieg toe hy aan die hof gesê het hy het gesien hoe die twee mans die tienerseun vermoor. Die Sondagkoerant Rapport het vroeër vandeesmaand onthul dat Pakisi glo teenoor twee mense gebieg het dat hy in die hof gelieg het en dat sy bekentenis op band opgeneem is.

Die hof het vroeër op Pakisi se getuienis staatgemaak toe hy beslis het Doorewaard en Schutte het Mosweu op 20 April 2017 van ʼn bewegende bakkie af gegooi. Mosweu het sy nek gebreek en is kort ná die voorval dood.

Die staat sal na verwagting drie getuies oproep om ter verswaring van vonnis te getuig, waarna die verdediging sy getuienis ter versagting van vonnis sal aanbied.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

66 Kommentare

jongste oudste gewildste
Thea

Waar kan die EFF die hof voorskryf, op watter grond
die enigste oog getuie het dan gelieg
hoe nou????

Lee

Nou wonder ek …… hoe lank gaan die manne nou in die tronk sit voordat die appèl saak afgehandel is. Die getuie het mos erken dat hy gelieg het. Hopelik kry die manne borg.

Ai tog!

Hulle gaan voort om hulle te vonnis, maar die enigste getuie het onder eed gejok, en hy het gaan bieg daaroor! Hoe dan nou! Ek sien Gerrie Nel en Barry Roux samel geld in om hierdie 2 ouens te help.

legens

stem saam met die EFF . kindermoordenaars verdien swaar strawwe . Lewenslank , met die klem op lewenslank , sonder aanmerking van parool . ons kinders moet beskerm word.

Albatros

Op grond van wat?