Bejaarde egpaar op Wes-Kaapse plaas vermoor

Elmien en Piet Steyn. Foto: Facebook

ʼn Egpaar van Bonnievale in die Wes-Kaap is Donderdagmiddag in hul plaashuis aangetref nadat hulle glo met ʼn haelgeweer doodgeskiet is.

Sers. Noloyiso Rwexana, polisiewoordvoerder, sê die egpaar (in hul 70’s), wat intussen geïdentifiseer is as Piet en Elmien Steyn, is met skietwonde in hul bed aangetref. Hul voertuig is verlate op ʼn ander plaas aangetref. Dis nie bekend of enigiets anders geroof is nie.

Sy sê geen ander besonderhede is nog bekend nie, maar speurders werk onverpoos om die bejaarde paartjie van die plaas Zandfontein se moordenaars op te spoor.

Marius Müller, nasionale operasionele koördineerder van AfriForum, sê die tydlyn van die dubbele moord is nog nie bevestig nie, maar die Steyns is vermoedelik reeds Woensdagnag of Donderdag in die vroeë oggendure vermoor omdat hul voertuig Donderdag deur die loop van die dag opgemerk is.

Piet Steyn se broer, Wikus, het Donderdagaand in ʼn Facebook-inskrywing wat intussen 2 000 keer gedeel is, geskryf Piet was soos ʼn pa vir hom. “Ek het die hoogste respek en agting vir hom gehad. [Piet en Elmien] se liefde vir hul kinders en kleinkinders en hul hulp in die gemeenskap is net oorskadu deur hul nederige lewe aan die Here se voete.”

Hy sê die Steyn-egpaar sal onthou word vir hul harde werk, maar veral vir hul gasvryheid. “Ek vergewe diegene wat dié aaklige daad gepleeg het,” voeg hy by.

Die polisie vra enigeen met inligting wat hulle in hul ondersoek kan help, moet Stop Misdaad by 08600 10111 bel.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

71 Kommentare

jongste oudste gewildste
Ronel

Baie sterkte aan die familie, om twee mense in ‘n familie op een slag onverwags te verloor, kan glad nie maklik wees nie. Hierdie moorde is so onaanvaarbaar.

Lollie

Ja ons kom nou by kerstyd. Almal besig om vir iets reg te maak. Geskenke, etes of familie wat kom kuier? Dan wonder ek net, hoeveel gaan nie eers kersfees sien nie? Ek kan dit nog aanvaar as dit siekte of ń ongeluk is maar as dit aan die hand van ń vreemdeling is! Die huidige regering met sy wette en sy sienings laat my dink aan die tyd can Hitler. Mense lewens beteken net mooi niks! Die son skyn vir almal maar sommiges soek hom net vir hulself! Kan enigeen so wreed wees en nog rustig in die aand… Lees meer »

KG

Ai tog dis so hartseer!! Hulle lyk na sulke oulike mense. My opregte simpatie aan al hul geliefdes. Ek het eintlik nie meer woorde vir die misdaad in ons land nie!!!

Andre

Vergewe die een wat die daad gepleeg het ……….? Aanvaar maar dat ons soos diere afgemaai , vergruis en vertrap word ………? EK SAL NIE !!

Jakalas

Die ergste van alles is dat dit nie gaan stop nie. Die moord syfer in die land bly maar net styg en die polisie kan niks doen nie. Dis baie hartseer.