Argieffoto: GCIS
Eskom het ʼn aansoek om verlof tot appèl ingedien nadat beslis is dat hy die Maluti-a-Phofung-munisipaliteit in die Oos-Kaap se bankrekening onmiddellik weer aan die munisipaliteit moet vrystel.
Die kragvoorsiener het in Julie die munisipaliteit se bankrekening laat vries sodat hy onbetaalde skuld deur die munisipaliteit kan verhaal. Eskom het kort daarna ook ingestem om R90 miljoen van die munisipaliteit se gevriesde fondse beskikbaar te stel sodat die munisipaliteit sy werknemers se salarisse kan betaal en ander lopende koste kan dek.
Die hooggeregshof in Bloemfontein het egter Vrydag beslis Eskom moet die munisipaliteit se bankrekening en die geld daarin onmiddellik vrystel.
Stefanie Jansen van Rensburg, woordvoerder van Eskom, het gesê die kragvoorsiener het die munisipaliteit se bankrekening aanvanklik laat bevries om ʼn gedeelte van die R5,4 miljard wat die munisipaliteit aan hom skuld te verhaal. Die hofbevel is reeds in 2018 bekom nadat munisipaliteit herhaaldelik versuim het om sy verpligtinge teenoor die kragvoorsiener na te kom.
Eskom het nou ʼn aansoek om verlof tot appèl teen Vrydag se uitspraak ingedien aangesien die munisipaliteit se voortdurende wanbetaling volgens Jansen van Rensburg lei tot ʼn verdere eskalering van hul agterstallige skuld.
“Dit hou ook ʼn ernstige bedreiging vir Eskom se finansiële lewensvatbaarheid en die voortbestaan van die kragvoorsiener in. Die munisipaliteit se toenemende skuld dwing Eskom om drastiese stappe te doen om hierdie onmiskenbare risiko die hoof te bied.”
Howe is ‘n klug en sirkus. Van bakboord na stuurboort gestuur teen ‘n prys vir die belastingbetaler.
Laat onafhanklike kragvoorsieners toe om ook by te dra tot die netwerk
Dit is darem n hele klomp geld vir so klein dorpie vir salarisse!!