Familielede slaan glo tiener dood

Foto bloot ter illustrasie. (Argieffoto)

ʼn Tiener is glo die afgelope naweek deur lede van sy familie doodgeslaan nadat hulle hom daarvan beskuldig het dat hy ʼn T-hemp gesteel het.

Drie verdagtes, onder wie sy tannie, is ná die voorval in hegtenis geneem en het reeds in die hof verskyn. Een verdagte is steeds op vrye voet, maar die polisie verwag om hom ook binnekort vas te trek.

Brig. Selvy Mohlala, polisiewoordvoerder, sê Andile Sambo (18) is glo op die dag van sy moord deur sy tannie en drie ander familielede by hul huis op Numbi in Mpumalanga aangekeer. Hulle het beweer dat hy ʼn venster gebreek en ʼn T-hemp gesteel het.

“Die oorledene is toe na bewering met ʼn houtvoorwerp en ʼn sambok aangerand. Hy het beserings aan sy kop en lyf opgedoen,” sê Mohlala.

“Hy is daarna na die Phola Nsikazi-kliniek geneem vir behandeling, maar het kort daarna aan sy beserings beswyk.”

Sambo was ʼn gr. 10-leerder aan die Bhekiswako Secondary School.

Die drie verdagtes, Gladys Mashabane (51), Skholiwe Mbuyane (27) en Sandiso Mbuyane (26), is kort daarna in hegtenis geneem.

Die verdagtes het Maandag in die Kabokweni-landdroshof verskyn op aanklagte van moord. Hulle is nog in polisieaanhouding tot hulle Vrydag in die Masoyi- rondgaande hof sal verskyn vir ʼn formele borgtogaansoek.

Lt.genl. Semakaleng Daphney Manamela, provinsiale polisiekommissaris, het die voorval ten sterkste veroordeel en sê niemand mag die reg in eie hande neem nie.