Foto’s: EFF-lede sak landwyd toe op Clicks-winkels

EFF-lede voor die Clicks in die Menlyn-winkelsentrum in Pretoria (Foto: EFF Twitter)

Protesaksies het talle Clicks-winkels landwyd Maandag tot stilstand gebring nadat ʼn rasseherrie vroeër die naweek op sosialemediaplatforms losgebars het oor ʼn advertensie op die kleinhandelaar se webwerf.

Die EFF het Sondagmiddag gedreig om sake by al die kleinhandelaar se takke tot stilstand te bring waarna EFF-lede Maandagoggend by verskeie Clicks-winkels in die land betoog en ʼn bohaai opgeskop het.

Die Clicks in die Saveways-winkelsentrum in Emalahleni is vanoggend onder meer met ʼn petrolbom bestook.

EFF-lede en leiers van die party het onder meer buite die Clicks-winkels in die Goodwood-winkelsentrum in Kaapstad, die Highveld-winkelsentrum in Emalahleni, die Menlyn-winkelsentrum in Pretoria en die Mall of Africa-winkelsentrum in Midrand byeengekom. ‘n Clicks in Alberton is gevandaliseer en aan die brand gesteek.

Malema sluit die deure van die Cycad Clicks in Polokwane met ‘n ketting en slot (Foto: Verskaf)

Die EFF-leier, Julius Malema, het ook vanoggend by die Clicks in die Mall of the North in Polokwane opgedaag.

“Die enigste manier hoe kapitaliste sal jammer sê is wanneer geld betrokke is. Ons is in ʼn stryd teen die rassistiese finansiële sektor. Ons sal nie toelaat dat die onberouvolle en verdraaide rassisme van Clicks in Suid-Afrika voortduur nie,” het Malema gesê.

Hy is hierna na ʼn ander Clicks in Polokwane waar hy die winkel se deure met ʼn ketting en slot gesluit het.

Clicks se uitvoerende hoof, Vikesh Ramsunder, het intussen in ʼn ope brief om verskoning gevra.

Rakke is omgegooi in ‘n Clicks in Alberton (Foto: Twitter)

“Ek is diep teleurgesteld dat ons toegelaat het dat onsensitiewe en aanstootlike foto’s op ons webwerf gepubliseer word. Ek vra onvoorwaardelik om verskoning vir die seer en woede wat hierdie advertensie veroorsaak het,” skryf hy.

Ramsunder sê hoewel die foto’s en inhoud deur die verskaffer TRESemmé aan hulle verskaf is, dra hulle steeds skuld en het Clicks dus in die openbaar om verskoning gevra en die advertensie van sy webwerf verwyder. Hy het bygevoeg dat die nalatige werknemers wat vir die advertensie verantwoordelik was, reeds geskors is. Hulle was ook met TRESemmé in verbinding, wat ook om verskoning gevra het.

Protesaksie by die Goodwood-winkelsentrum in Kaapstad (Foto: Verskaf)

“Hierdie voorval het die noodsaak beklemtoon om al ons derdeparty (en ons eie) promosiemateriaal te oudit vir enige implisiete of eksplisiete vooroordele, sowel as om die personeel in ons hoofkantoor in diversiteit en inklusiwiteit op te lei. Dit sal dringend geïmplementeer word.”

Ramsunder sê Clicks het die afgelope naweek ʼn buitengewone raadsvergadering belê om sy volgende stappe te bespreek. Dit sluit in die prioritisering van ʼn opleidingsprogram vir diversiteit en insluiting.

“Ons werk saam met ʼn uitgebreide lys van verskaffers, meer as 20, om te verseker dat ons meer as 40 natuurlike haarsorgreekse in ons winkels het. Sedert 2005 het ons die aantal natuurlike haarprodukte op ons rakke met meer as 4 000% uitgebrei.”

“As ʼn onderneming kan ons nie verander wat gebeur het nie, maar ons leer hieruit. Ons is daartoe verbind om werklike, sistemiese veranderinge in ons onderneming te bewerkstellig wat ons trots daarop maak om ʼn eg Suid-Afrikaanse maatskappy te wees. Ons het baie gedoen in terme van transformasie. Hierdie kwessie het duidelik beklemtoon dat ons nog baie meer moet doen.”

Soos vroeër berig het Clicks in die sop beland nadat hy ʼn advertensie geplaas het waarin na verskillende vroue se verskillende haarsoorte verwys word. In die advertensie word die byskrifte “frizzy & dull” en “dry & damaged” gebruik by die foto’s van swart vroue se natuurlike hare, terwyl die byskrifte “fine & flat” en “normal” by foto’s van wit vroue se hare gebruik word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

90 Kommentare

jongste oudste gewildste
Pieter

Hulle optogte lyk maar klein en min. Clicks moet hulle aankla van geweld en oorlog en skade.

Hendrik

Malema moet maar goeie shampoo gebruik vir sy hare. Dit is so bietjie dof.

Genis

Hoe kan hierdie misdaade Geduld word? Dis mos saak beskadiging? Of monitor die patetiese SAPD weer van ver af?

Piet

Lyk my EFF kry nou hul sin met al die Clicks winkels wat nou op ‘n streep sluit. Boonop is Clicks se dringende hofaansoek om die protes te keer met koste van die hand gewys. So die EFF beheer nou wie sake doen en wie nie. Dis ‘n belaglike situasie maar die hof seg dis oukei. Piesang-Republiek.

Manie

Genoeg rede om hulle op verskeie klagtes te arresteer. Kom ons of daar teen hulle opgetree gaan word, dan sal ons sien in welke mate Ramaphosa in beheer is soos hy wil voorgee.