Foto’s: Mej. SA op pad na VSA vir mej. Heelal-kroon

Zozibini Tunzi het Dinsdagaand na die VSA vertrek waar sy Suid-Afrika sal verteenwoordig in die mej. Heelal-kompetisie. (Foto: Verskaf)

Mej. Suid-Afrika, Zozibini Tunzi, het Dinsdagaand haar aanhangers en landgenote op die OR Tambo-lughawe met ʼn breë glimlag gegroet voordat sy haar reis na die VSA aangepak het vir haar deelname aan die 68ste jaarlikse mej. Heelal-kompetisie.

Zozi, soos die 25-jarige skoonheid onder haar aanhangers bekendstaan, sal op 8 Desember in Atlanta, Georgia, teen verteenwoordigers van 91 ander lande meeding vir die gesogte mej. Heelal-titel.

Sy het gestraal terwyl sy haar ondersteuners bedank het wat die tyd geneem het om haar op die lughawe te groet en haar op sosiale media gelukgewens het.

“Ek is so dankbaar vir die liefde wat ek ontvang sedert ek as mej. SA gekroon is. Ek is veral verheug deur die wonderlike boodskappe van aanmoediging, wat my sterkte toewens vir die avontuur waarop ek nou vertrek. Ek is uiters opgewonde en hoop ek kan Suid-Afrika trots maak,” het Tunzi gesê.

Tunzi is van Tsolo in die Oos-Kaap afkomstig en het tot en met haar kroning in Tuine in Kaapstad gebly waar sy studeer en gewerk het. Sy het egter na haar kroning as mej. SA die Moederstad vir die Goudstad verruil.

Zozibini Tunzi sal teen verteenwoordigers van 91 ander lande meeding vir die gesogte mej. Heelal-kroon. (Foto: Miss Universe)

“Ek neem die ontembare Suid-Afrikaanse gees saam met my. Wat meer het ek nodig as die ondersteuning van Suid-Afrikaners wat, wanneer hulle saam staan, onkeerbaar is?” het sy gesê. “Ek is gereed.”

Demi-Leigh Nel-Peters (24), is in 2017 in Las Vegas as mej. Heelal gekroon, terwyl mej. SA 2018, Tamaryn Green, verlede jaar as naaswenner in dié kompetisie aangewys is. Mej. Filippyne, Catriona Gray, is met die titel huis toe.

Nel-Peters, wat eersdaags voor die kansel staan saam met haar verloofde, die bekende Amerikaanse sportster Tim Tebow, het Woensdagoggend ʼn roerende boodskap oor haar eie reis as mej. Heelal op sosiale media gedeel.

“Vandag twee jaar gelede,” het sy geskryf by ʼn video waar sy aangekondig word as mej. Heelal. “Hierdie oomblik het alles verander. Dankie aan Suid-Afrika en die mej. Suid-Afrika-organisasie, dat julle in my geglo het en my die geleentheid gegee het om julle te verteenwoordig. Om mej. Heelal te wees was ʼn lewensveranderende ervaring en ek sal vir altyd dankbaar wees. Oor ʼn paar dae verwelkom ons ʼn nuwe suster by die susterskap en ek kan nie meer opgewonde wees nie.”

Gray sal vanjaar die kroon aan haar troonopvolger oorhandig by Tyler Perry Studios in Atlanta.