Argieffoto bloot ter illustrasie. (Foto: Andre Morales Kalamar/Unsplash)
ʼn Skermsweefvlieënier van Gauteng is vroeër die naweek in ʼn skermsweefongeluk naby Citrusdal in die Wes-Kaap dood.
Volgens die Suid-Afrikaanse hangsweef-en-valskermsweef-vereniging (Sahpa) het die man (37) slegs vir ontspanning geskermsweef.
Hy het egter Vrydagmiddag aan ʼn geleentheid van die Glen Valskermsweefklub deelgeneem toe hy in die moeilikheid beland het.
Die presiese omstandighede rakende die ongeluk is nie bekend nie.
ʼn Ondersoek is van stapel gestuur, aldus Sahpa.
Volgens die vereniging sal daar verklarings by ooggetuies afgeneem en die saak ondersoek word om die bydraende faktore te verstaan.
“Sahpa mag nie die identiteit van die vlieënier bekend maak nie, en ook nie bespiegel oor die oorsaak van die ongeluk nie,” het die vereniging dit duidelik gestel.
