Geliefde barbier sterf

Fred Moss (Foto: Wendy van Rensburg Photography via Twitter)

Fred Moss, die legendariese barbier van Melville, Johannesburg, het Dinsdag in die ouderdom van 68 gesterf. ’n Gewas is Desember in Moss se long ontdek, waarna hy ’n paar weke later aan ’n hartaanval gesterf het.

Moss was die afgelope 53 jaar die eienaar van die bekende Scala Barber in Melville. Bekende name soos Kobus Wiese, Frank Opperman, Neels van Jaarsveld en Lochner de Kock het gereeld op Moss se barbierstoel gesit.

Moss was bekend daarvoor dat hy nie net klante se hare versorg het nie, maar ook hul dag opgekikker het met sy geselsies en grappies.

Moss se dogter, Charntell Mynhardt, vertel haar pa het ’n jaar en ’n half gelede ’n gewas uit sy long laat verwyder. Hoewel die operasie ’n sukses was, het die gewas Desember teruggekom.

“Die dokters was beïndruk oor hoe vinnig my pa na die operasie herstel het en ons was positief oor die toekoms,” het Mynhardt aan Maroela Media vertel.

Volgens Mynhardt het Moss haar op 15 Desember gebel en gekla van ’n vreeslike pyn in sy sy. Sy toestand het oor die volgende paar dae versleg.

“Ek het my pa op 30 Desember dokter toe gevat. Hy was toe al baie swak. Sy kalsiumtelling was hoog en hulle het iets op sy X-strale raakgesien.”

Moss is op 4 Januarie in die hospitaal opgeneem. Die dokter het hom vir ’n CT-skandering gestuur en só die gewas in sy long gewaar.

“Die gewas het aan die kant van dieselfde long gegroei as waar die vorige gewas uitgesny is. Dié keer was die gewas groter en dit het druk op sy hart geplaas.”

Mynhardt vertel Moss was Maandag bleek en kort van asem.

“Hulle sou Dinsdag ’n biopsie van die gewas neem, waarna sy behandeling sou volg. Die dokters het my egter Dinsdagoggend vroeg in kennis gestel dat my pa ’n hartaanval gehad het. Dit kon wees weens die drukking wat die gewas veroorsaak het.”

’n Legende

Die winkel is in 4de Laan geleë en is vertoon in die oorspronklike temalied van die gewilde Afrikaanse sepie 7de Laan (Foto: Verskaf)

Moss het in 1971 die Scala Barber by sy pa en dié se swaer oorgeneem.  Hy het in 1969 – ná sy diensplig – sy vakleerlingskap by Scala Barber gedoen en daarna die winkel as trotse eienaar oorgeneem. Die winkel is in 4de Laan geleë en is vertoon in die oorspronklike temalied van die gewilde Afrikaanse sepie 7de Laan.

“Ek weet nie waar my pa se belangstelling as barbier vandaan kom nie. Hy het ná die weermag begin hare sny en dit tot die dag van sy dood gedoen.

“My pa het gelewe vir sy werk. Dit was sy passie. As ons gewoonlik sou weggaan met vakansie – en nie te ver uit Melville gereis het nie – sou hy steeds Saterdae vroeg opstaan, deurry Melville toe en die winkel vir die oggend oopmaak.”

Mynhardt vertel haar pa se naam was op almal se lippe en hy was baie geliefd.

“Sy barbierwinkel was nie sommer net nog ’n barbierwinkel nie. Sy winkel was warm, wat sy passie vir sy werk en liefde vir mense uitgestraal het. My pa het vreeslik omgegee vir sy klante en sy winkel was oop vir enigiemand. Sy klante het nie net vir ’n haarsny gegaan nie, hulle het na ’n vriend toe gegaan met wie hulle kan gesels en grappies deel.”

Kobus Wiese het as student by Moss begin hare sny en 25 jaar lank by sy winkel aangeklop.

“Ek het as student toevallig op Fred se winkel afgekom en het toe nooit weer by iemand anders hare gesny nie. Fred het my vriend geword. Ek sal ons geselsies vir altyd koester.”

Volgens Wiese het Moss al sy klante persoonlik geken en belanggestel in hul lewens.

“Sy klante was sy prioriteit en sy werk sy trots. Almal het hom geken vir sy werketiket, presiesheid en netheid.”

Moss word deur sy drie dogters, Mynhardt, Charlene Cloete en Theresa Moss, oorleef. Sy vrou is in 2019 oorlede.

Moss word Vrydag om 13:00 in Melville ter ruste gelê. Die roudiens sal ook aanlyn uitgesaai word.