Gigaba weier om te bedank

Malusi Gigaba, minister van binnelandse sake. Foto: ANA

Malusi Gigaba, die beleërde minister van binnelandse sake, sê hy sal net bedank as pres. Cyril Ramaphosa vra hy moet.

“Ek gaan nie bedank nie,” het Gigaba die naweek in ʼn eksklusiewe onderhoud met eNCA gesê, “maar ek sal my natuurlik laat lei deur my organisasie, die African National Congress, en ek sal dien solank die president wil hê ek moet.”

Hy het onder meer gepraat oor die konstitusionele hof se beslissing dat hy nie mag appelleer nie teen ʼn hofbeslissing dat hy in die Fireblade-saak in die hooggeregshof onder eed gelieg het.

Gigaba het gesê hy en Ramaphosa ontmoet mekaar binnekort sodat hy sy weergawe van die Fireblade-saak kan stel, “want ek is nog nooit kans gegun om my kant van die storie te stel nie”. Hy het die naweek aan die Sunday Times gesê dis die Oppenheimers wat lieg, nie hy nie.

Die minister beweer nou strydig met hofbeslissings en die verslag van die openbare beskermer, adv. Busisiwe Mkhwebane, het hy nooit goedkeuring gegee vir die inrigting van die Oppenheimers se Fireblade-terminaal op die OR Tambo- internasionale lughawe vir baie belangrike en baie, baie belangrike gaste nie.

Ál meer stemme klink op wat Gigaba se bedanking eis. Die afgelope week het ʼn seksvideo wat hy kwansuis aan sy vrou wou stuur, in die sosiale media opgeduik. Hy het beweer kuberkrakers met politieke bymotiewe het toegang tot sy foon gekry en die video gebruik om hom af te pers.

Intussen wil die nasionale tesourie ondersoek instel na sy rol in die Transnet-lokomotieftransaksie wat glo beplan is om die Gupta-familie finansieel te bevoordeel.

Gigaba was ʼn jaar lank minister van finansies onder oudpres. Jacob Zuma, maar in Februarie vanjaar het Ramaphosa hom met sy bewindsaanvaarding minister van binnelandse sake gemaak.

Hy het aan eNCA gesê hy veg om sy integriteit te beskerm “en om my beeld te beskerm en seker te maak dat ek nie die slagoffer van onderduimse politieke veldtogte word nie”.

Volgens hom is die seksvideo deur politieke teenstanders uitgelek. In ʼn onderhoud dié naweek met die SAUK het hy gesê hy en sy vrou het “niks om ons oor te skaam nie”, want die video se bekendmaking was “bedoel om my polities te onthoof, om my en my gesin in die openbaar te verneder en die ANC in die skande te steek”.

Die openbare beskermer het aanbeveel dat stappe teen Gigaba gedoen word omdat hy onder eed gejok het, maar in die onderhoud met eNCA het hy meermale ontken dat sy getuienis onwaar was.

Hy het gesê dit voel asof hy gebuk gaan onder ʼn “sneeustorting van druk” wat alles polities gemotiveer is en wat hom wil skets “as iemand wat nie geskik is om ʼn openbare amp te beklee nie, sonder dat ek ʼn regverdige kans gekry het om my kant van die saak te stel en sonder dat daar na my geluister word”.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Ben

Hierdie man het onder eed gejok. Die ander sake is van onbelang. Hoe kan die publiek hom ooit vertrou?

SjN

Hy sal natuurlik klou soos n neut, hoop CR steek hom in die pad.

ANONIEM

Ja nee raak onslae van al hierdie kriminele wat ons eens mooi land so opvoeter, sluit hom sommer toe en gooi weg die sleuetel leunaar.

Oujongvrou

Hy moet bly wees hy kry die opsie om te bedank. Sodoende behou hy sy pensioen. Hulle moet hom afdank. Maar wie sal nou ook wil bedank as jy groot salaris kry en vry toegang het tot korrupsie en scooping uit staatskas.

Asmain

Hy kan nie bekostig om te bedank nie, dan kom die soustrein tot stilstand! Nou stoom hy maar voort op belastingbetalers se geld!