Harde woorde val met AfriForum-voorlegging oor grondhervorming

Roets en Monique Taute, AfriForum se hoof van veldtogte en antikorrupsie-eenheid.

Die ergste en mees aggressiewe uitsprake tot dusver oor grondhervorming het vanmiddag gevolg tydens en ná die burgerregte-organisasie AfriForum se voorlegging aan die parlement se ad hoc-komitee wat moet besluit of die Grondwet gewysig moet word om onteiening sonder vergoeding te vergemaklik.

Ernst Roets, adjunk- uitvoerende hoof van AfriForum, het die organisasie se voorlegging hanteer. Hy het begin met voorbeelde waarin die regering se grondbeleid misluk het vir sowel swart as wit boere.

Daarna het Roets aangevoer dat wat hy die ANC/EFF-alliansie genoem het, gewortel is in Marxisme en Leninisme en die sentralisering van staatsmag en die soeke om Suid-Afrika ʼn kommunistiese staat te maak.

Hy meen die doelwit is om beleid wat in die Sowjetunie, China, Kuba, Kambodja, Zimbabwe en Venezuela toegepas is, nou ook in Suid-Afrika toe te pas, en die wêreld se suksesvolste ekonomiese beleid as rassisties en onderdrukkend uit te beeld.

Dit is na Roets se mening waarom soveel swart pioniersboere kla oor die regering, en waarom 23% van Suid-Afrikaners reeds tans op staatsgrond woon, en hoekom net 6% van die grond wat oorgedra is vir restitusie, tans aan swart private eienaars behoort.

Volgens Roets is dit ʼn leuen dat wit mense grond gesteel het. Wit mense het volgens hom grond bekom op drie maniere – hulle het hulle op onbewoonde grond gaan vestig, hulle het grond deur ooreenkomste of aankope bekom, en hulle het grond verower.

Roets het toegegee dat wetgewing soos die Naturelle Grond-wet van 1913 en die Groepsgebiedewet onregte is wat reggestel moet word, maar het aangevoer enigeen wat meen wit mense kan nie grond in Afrika besit nie, is soos die Europese fasciste wat meen dat swart mense nie grond in Europa moet kan besit nie. Hy het aangevoer diegene wat meen swart mense moet grond in Europa kan besit, maar wit mense mag nie grond in Afrika besit nie, is skynheilige rassiste.

Volgens Roets het die regering reeds R50 miljard op grondhervorming uitgegee en in die proses net 5% van die grond aan swart besit oorgedra. Hy het aangevoer as die hele bedrag vir grondaankope aangewend is, sou die helfte van die land se plase aangekoop kon gewees het.

Dit sou egter volgens hom nie gestrook het met die doelwitte van die nasionale demokratiese rewolusie nie. Hy het ook die Motlanthe-kommissie aangehaal dat wanbesteding en korrupsie aan die wortel van die kwaad met grondhervorming sit.

Roets het voorts aangevoer dat onteiening sonder vergoeding sleg is vir beleggersvertroue en uitgewys dat Suid-Afrikaners sedert 2015 vir die eerste keer in die geskiedenis meer geld buitelands as binnelands belê. Hy meen om aan te voer onteiening sonder vergoeding is goed vir die ekonomie is soortgelyk as om te beweer Kentucky Fried Chicken tree op in belang van hoenders.

Na Roets se mening voldoen voorstanders van onteiening sonder vergoeding se aandrang om steeds dieselfde stappe wat in die verlede misluk het te volg, neer op Albert Einstein se definisie van gekheid: om dieselfde ding by herhaling te doen en ʼn ander gevolg te verwag.

Hy meen die ANC en die EFF put meer genot daaruit om die middelklas seer te maak as om armes op te hef. Roets het voorts aangevoer die ANC en EFF se beleid sal lei tot ekonomiese ineenstorting en hongersnood wat die armstes die ergste sal tref. Die welvarendste Suid-Afrikaners sal die land verlaat, wat die belastingbasis sal vernietig.

Roets meen daar is nie grondhonger in die land nie, want 59% van grondeise en 84% van grondbesettings is in stedelike gebiede. Swart Suid-Afrikaners verstedelik boonop vinnig en 93% van diegene wat ʼn keuse tussen grond en geld gebied is, het geld verkies.

Roets het gevra dat die grondkwessie nie ʼn raskwessie moet word nie. Hy meen die ANC en die EFF doen dit egter reeds. Hy meen wit mense word deurgaans vir die wandade van ander wit mense geblameer, maar dis ewe onaanvaarbaar as om swart mense as moordenaars uit te kryt omdat sommige swart mense moordenaars is.

Hy het gevra of swart mense nou reparasies gaan betaal vir die moorde te Bloukrans en Weenen, of die moord op die Van Rensburgtrek. Hy is oortuig daarvan dat diegene wat aandring op reparasies nie eens weet wat hierdie historiese gebeure was nie.

Hy het parlementslede daarvan beskuldig dat hulle dronk is van ideologie – ʼn ideologie nie gegrond op historiese feite nie, maar op die wil om rassehaat en hopelose sosialisme aan te blaas onder die voorwendsel van regstelling.

Roets het afgesluit deur LP’s daarvan te beskuldig dat hulle dronk is van die ideologie van die mislukkende nasionale demokratiese rewolusie. Hy het gesê hulle is magsdronk, want elke besluit is daarop gemik om hul eie mag te vergroot. Hy het beweer hulle is dronk van haat en neerbuigendheid – nie net vir wit mense nie, maar ook vir die armes wat die meeste sal ly onder haat en verdeeldheid.

Die reaksie van LP’s was ewe aggressief. ANC-LP’s het gesê dis onwaar dat groot dele van die land onbewoon was toe die Voortrekkers die binneland ingetrek het, en vir Roets vertel hoe hul oupas teen die afneem van hul grond geveg het. Hulle het hom gevra wat hy in hul posisie sou dink.

ANC-LP’s het Roets daarvan beskuldig dat hy swart mense haat, en dat sy haat vir die ANC en EFF sy denke oorheers. Daar is uit ANC-kant aangevoer dat die land nie voedselsekerheid het solank die armes honger ly soos al eeue die geval is nie.

ANC-lede het aan Roets gesê dat hulle probeer om simpatiek na hom te luister, maar dat hulle hom arrogant vind veral omdat hulle ervaar dat hy hulle uitgeskel het. Hulle het AfriForum daarvan beskuldig dat hulle so erg soos Black First Land First is en gesê die voorlegging is ʼn skande wat in die toekoms teen AfriForum sal tel, en dat AfriForum homself sal vernietig.

Die UDM het aangevoer die enigste positiewe ding van die voorlegging was dat dit so eksplisiet was. Tien grensoorloë is in die Oos-Kaap geveg met die gevolg dat 3 miljoen hektaar in die provinsie nou aan wit mense behoort en 250 000 hektaar aan swart mense. Die UDM het AfriForum daarvan beskuldig dat AfriForum die land wil terugneem na ʼn oorlogsituasie en dat hulle swart mense se harte verhard. Die UDM sien geen nut in gesprekke met AfriForum nie en oorweeg nou steun vir die verandering van die Grondwet.

Die IVP het teen AfriForum se voorlegging te velde getrek en uitgestap nadat hulle AfriForum daarvan beskuldig het dat hul voorlegging op woede eerder as historiese feite berus.

Cope het gevra of AfriForum enige oplossings aan die hand doen en die DA het hulle van AfriForum se voorlegging gedistansieer. Die ACDP het gesê Roets moet weer nadink oor sy standpunte wat nie ʼn positiewe bydrae is tot nasiebou nie en van arrogansie getuig.

Volgens die ACDP laat AfriForum mense hul harte verhard en is hulle ekwivalent aan Black First Land First. Die ACDP het Roets herinner aan die bergpredikasie: Geseënd is die vredemakers, want hulle sal die kinders van God genoem word.

Die VF Plus het niks gesê nie. Die EFF het gesê wit mense het swart mense se grond gevat en swart mense doodgemaak. Wit mense het die meeste grond, en Roets se voorlegging was arrogant.

Die EFF het gesê as AfriForum oorlog wil hê, sal hulle dit kry, en dat hulle die verpersoonliking van Afrikanerrassisme uit Pretoria is. Die EFF meen AfriForum se gedrag tydens lede se onlangse Amerikaanse besoek was leuenagtig en verraderlik, en dat grond bloot afgeneem moet word.

Die proses duur volgende week voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

190 Kommentare

jongste oudste gewildste
Boeremeisie

Soveel haat daar is geen toekoms hier nie

Hoc est bellum

Toe ek dié lees het ek (as padda) gevoel dat die hitte van die kookwater in die pot so bietjie afgeneem het.

Andrea

Uiteindelik n eerlike opsomming van hoe baie wit en swart SAners voel. Ek dink die streep is openlik in die grond van ons geliefde land getrek. Die uitkoms is redelik voor die hand liggend.

Tommie

Hoë bome vang die meeste wind.

Leon

Die reaksie van min of meer alle verteenwoordigers in die parlement wat te verwagte.
Ek gee Roets 10 uit 10 vir sy voorlegging wat ek total ondersteun. Die waarheid pas nie die anc/eff agenda nie.

Veral om die agenda van die “nasionale demokratiese revolusie” aan OSV te koppel sal die kritici van Afriforum en Roets, hopelik eendag sal laat wakker skrik.

Aan daai klomp in die parlement (veral die verraaier Koornhof) weet die staat wat julle sogenaamd lei is ‘n mislukte staat.