Hof sê departement mag ras as maatstaf gebruik

Kallie Kriel, uitvoerende hoof van AfriForum. (Foto: AfriForum)

Solidariteit en AfriForum gaan die Grondwethof direk nader met ’n appèlaansoek teen die uitspraak van regter Jody Kollapen van die Noord-Gautengse hooggeregshof in Pretoria. Dit volg nadat Kollapen Donderdag beslis het dat die departement van toerisme ras wel as kriterium vir die toekenning van finansiële hulp aan klein, mediumgrootte en mikro-ondernemings (KMMO’s) kan gebruik.

Regter Kollapen het beslis dat die kriteria nie aan sekere kandidate ’n onregverdige voordeel op grond van ras bied nie, maar bloot aan dié kandidate ʼn voorsprong gee. Kollapen het ook beslis dat die raskriteria so ʼn klein persentasie van die besluit oor die toekenning van finansiële hulp uitmaak dat ander ondernemings dus steeds ʼn kans gegun word om in aanmerking hiervoor te kom.

Die organisasies het die hof genader toe dit bekend word dat die departement van toerisme die bepalings van swart ekonomiese bemagtiging gaan gebruik om te bepaal watter ondernemings finansiële bystand kry weens die verliese wat hulle tydens algehele afsondering ly.

Solidariteit het geargumenteer dat die pandemie nie op grond van ras teen sy slagoffers diskrimineer nie en dat dit dus immoreel van die regering is om hulp op hierdie gronde aan te bied. “Dit is nie net wit eienaars van ondernemings wat geraak word nie, maar ook alle werknemers in die bedryf waarvan twee uit elke drie swart is. Honger en nood ken geen kleur nie,” voer die vakbond aan. Volgens Dirk Hermann, bestuurshoof van Solidariteit, eis AfriForum en Solidariteit grondwetlike sekerheid oor hierdie uitspraak en het daarom besluit om op ’n dringende basis die Grondwethof te nader.

“Dit is skrikwekkend dat daar tydens ʼn krisistyd regsruimte kan wees vir die toekenning van hulp op grond van ras. Indien daar bevind sou word dat daar wel grondwetlike ruimte is vir hierdie tipe rasbenadering binne ʼn ramptoestand, dan het Suid-Afrika nie regstaat nie, maar wel ʼn staat gegrond op ras,” sê Hermann.

Hermann sê indien die Grondwethof die hooggeregshof se uitspraak sou handhaaf, sal Solidariteit sonder twyfel die Verenigde Nasies (VN) se komitee vir die uitwissing van alle vorme van rassediskriminasie oor die saak nader.

“Ons sien hierdie saak as ʼn growwe vorm van rassediskriminasie. Hierdie optrede van die regering kan op geen manier geregverdig word nie en daarom sal Solidariteit dit nie daar laat nie,” sê Hermann.

Kallie Kriel, uitvoerende hoof van AfriForum, sê klein toerisme-ondernemings, wat deur lede van minderheidsgemeenskappe besit word, het tans net soos alle ander klein toerisme-ondernemings dringend finansiële hulp nodig.

“As die saak sloer, sal talle kleinsakeondernemings ondergaan en sal die regering aandadig wees daaraan,” sê Kriel.

Kriel sê hulle sal duidelikheid by die Grondwethof moet kry of dit daadwerklik die geval is dat die huidige grondwetlike bedeling in so ’n mate minderhede se regte ondermyn dat daar selfs tydens krisistye teen wit mense gediskrimineer mag word.

“Indien dit wel so is, sal minderheidgemeenskappe moet besef dat hulle slegs op hul eie gemeenskappe aangewese is en dat stappe gedoen sal moet word sodat lede van minderheidsgemeenskappe mekaar kan ondersteun om oorlewing te verseker,” sê Kriel.

Solidariteit en AfriForum was op 28 April in die Noord-Gautengse hooggeregshof om te vra dat die rassemaatstaf van die departement van toerisme hersien moet word. Dit volg nadat Solidariteit op 25 Maart ʼn klagte by die Menseregtekommissie (MRK) ingedien het nadat die regering bekend gemaak het dat ras, eerder as nood, die bepalende faktor vir die toekenning van noodfondse sal wees. ʼn Dringende aansoek is op 30 Maart op die departement beteken.

Solidariteit argumenteer dat die pandemie nie op grond van ras teen sy slagoffers diskrimineer nie en dat dit dus immoreel van die regering is om hulp op hierdie gronde aan te bied.

“Dit is nie net wit eienaars van ondernemings wat geraak word nie, maar ook alle werknemers in die bedryf waarvan twee uit elke drie swart is. Honger en nood ken geen kleur nie,” het Hermann vroeër gesê.

Die departement van toerisme se verweer was dat hy wetlik verplig is om swart ekonomiese bemagtiging toe te pas, ongeag die gevolge van beweerde verpligting.

Volgens Kriel het AfriForum voorsien dat die regering sy rug op ondernemings vanuit minderheidsgemeenskappe gaan draai en het gevolglik reeds www.afriforumnetwerk.co.za tot stand gebring waar kleinsakeondernemings gratis kan registreer sodat lede van hul plaaslike gemeenskappe hulle daar kan opspoor en ondersteun.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
Frans

Ek hoop die wit mense wat busnes besit se oe gaan nou oop neem jou eie ras indiens en kyk na mekaar

Andre

Geen voordeel, net ‘n voorsprong. Ace, ek verstaan dit net as ek nie daaraan dink nie.

Nie Verbaas

Wel, die uitspraak is uiters teleurstellend. As geregtigheid nie eers meer geskied nie dan kan mens baie dinge begin verstaan. Ek hoop dat dit die VN se oe sal laat oopgaan oor wat werklik in Suid Afrika gebeur.

Jaco

Ek verstaan dit nie. Hierdie virus affekteer ons almal en ons besighede. Nou as ons nie hulp kry nie, hoekom moet ons die kwarentyn reëls gehoorsaam?? Sal my besigheid Maandag 100% oopmaak en seker maak dat alle werkers maskers dra en higiënies is.

Heleen

En so word die wittes se belastinggeld gebruik om swartekonomiese bemagtiging te bevorder.
Absoluut belaglik!