Jaarlikse inflasie het effense skiet gegee en staan vir Junie op 4,9% nadat dit in Mei ʼn rekordhoogtepunt van 5,2% bereik het.
Statistieke Suid-Afrika (StatsSA) het Woensdag gesê die maandelikse styging in die verbruikersprysindeks (VPI) was 0,2%, ʼn styging van die 0,1% in Mei, maar laer as die 0,5%-styging wat tussen Mei en Junie verlede maand opgeteken is.
StatsSA sê dit was weereens duidelik watter belangrike aandrywer van inflasie kos en nie-alkoholiese drankies, asook brandstof, is. As die jaarlikse VPI daarsonder bereken word, staan dit op 3,4% vir Junie – heelwat laer as die 4,9%-kerf wat vir inflasie gestel is.
Brandstof
Brandstofpryse het in Junie met 27,5% gestyg wanneer dit met dieselfde tyd ʼn jaar gelede vergelyk word. Dit is laer as die styging in Mei (37,4%), maar steeds hoër as die 21,4%-styging in April.
Brandstofpryse in verlede jaar se tweede kwartaal was egter uiters laag.
Op ʼn maand-tot-maand-grondslag het brandstofpryse met 0,2% tussen Mei en Junie vanjaar gedaal. In die binneland was die prys van 95 oktaan-petrol 10c goedkoper, maar dieselpryse was 0,7% hoër.
Die jaarlikse styging in die dieselprys was 25,5% in Junie, met ʼn gemiddelde prys van R16,31 per liter.
Petrol se jaarlikse styging was 28,2%, sê StatsSA.
Kospryse
Die prys van kos en nie-alkoholiese drankies het op ʼn jaargrondslag met 6,7% toegeneem.
Die prys van olies en vette styg sedert Februarie verlede jaar ook steeds en in Junie vanjaar was die jaarlikse toename 21,6%.
Die prys van kookolie laat steeds die hare rys. In Junie verlede jaar sou ʼn bottel 750 ml-kookolie jou gemiddeld R20,99 uit die sak gejaag het. Dié prys het in Junie vanjaar op R29,45 gestaan.
Vleisinflasie versnel ook en het ʼn jaarlikse koers van 8,6% bereik nadat dit in Augustus verlede jaar op 4,1% gestaan het.
Die prys van skaapvleis is 10,9% hoër, stowevleis is nou 16,7% duurder en varkvleis kos 10,5% meer.
Só vergelyk die stygings met verlede jaar:
- Brood en grane: 4,5%
- Vleis: 8,6%
- Vis: 7,0%
- Melk, eiers en kaas: 6,3%
- Olie en vette: 21,6%
- Vrugte: -3,5%
- Groente: 6,7%
- Suiker, lekkergoed en nagereg: 7,2%
- Ander kos: 3,2%
Die indeks vir suiker, lekkers en nagereg toon ʼn jaarlikse styging van 7,2% in Junie vanjaar, maar is laer as die 8,7% wat in Mei opgeteken is. Prysstygings het effe verstadig van die 9,7% waarop dit in Oktober verlede jaar gestaan het.
Vrugte is volgens StatsSA een van die min items in verbruikers se kosmandjie wat goedkoper is. Dit het ʼn daling van 3,5% ondervind in vergelyking met dieselfde tyd ʼn jaar gelede.
Die prys van spiritualieë is 5,5% meer in vergelyking met ʼn jaar gelede, dié van wyn 6,7% meer en bier kos jou nou 3,3% meer as dieselfde tyd verlede jaar.
Die prys van tabak het die afgelope jaar met 6,5% gestyg.
Watter vrugte is goedkoper? Die vrottes? Ek kan nog steeds nie regtig vrugte en groente bekostig nie. Dis miskien goedkoper as verlede jaar maar nog steeds peperduur.
Dis omtrent net appels en lemoene wat bekostigbaar is. En so nou en dan piesangs. Ek kyk nie eens na mangoes of ander fancy goed nie.
Ons plaaslike groentewinkel se sak aartappels het tussen Saterdag en Dinsdag met R20 verhoog. Kos nou R100.
alles het oornag duur geword , nie net vrugte en groente nie . Dit is ‘n skande wat ons vir kos moet betaal
Al hierdie prys stygings lê in die hande van die oliemagnate
Haai rerig?
Dit sal goed wees as mens se salaris kan byhou met dié prysstygings, maar nou ja …. daai is “wishful thinking”!!!
Vrugte bly duur en kwaliteit by sommige winkels nie goed nie wou noudag lemoene koop ma al die sakkies lemoen e is pap , uie gekoop by huis gekom 2 uie vrot so gaan jou geld nog down the drain ook