Honde byt tuinwerker dood

(Argieffoto bloot ter illustrasie: Pixabay)

ʼn 45-jarige man is Maandag glo deur sy werkgewer se drie honde in Crystal Park in Benoni, Gauteng, doodgebyt.

Volgens sers. Lerato Mopeli, polisiewoordvoerder, was die man, wat glo tuinwerk gedoen het, alleen by die betrokke huis toe die voorval plaasgevind het. Dit het omstreeks 10:00 gebeur.

“Die polisie is deur ʼn lid van die gemeenskap ontbied. Die man was egter reeds dood teen die tyd wat die polisie op die toneel aangekom het.”

Die plaaslike dierebeskermingsvereniging (DBV) is ook na die toneel ontbied.

“Die honde is op ʼn menslike wyse van kant gemaak. Dit vorm deel van die standaardprosedure in so ʼn geval,” het Bronwen Kleynhans, woordvoerder vir die DBV, aan Maroela Media gesê.

Volgens Mopeli is ʼn nadoodse ondersoek reeds van stapel gestuur. Niemand is in verband met die voorval aangekla nie, hoewel ʼn ondersoek na die gebeure voortduur.

Dié aanval kom enkele weke ná Dupuo Kokolosi (47), ʼn huiswerker, in Potchefstroom, Noordwes, deur haar werkgewer se drie pitbulls verskeur is. Kokolosi het ernstige beserings aan veral haar gesig, arm en been opgedoen. Sy het reeds ʼn operasie ondergaan en word steeds in die Chris Hani Baragwanath-hospitaal in Johannesburg behandel. Die honde is tydens die voorval op die toneel doodgeskiet.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

29 Kommentare

jongste oudste gewildste
Hannelize

Hoe kan die huis eienaar die diere alleen los terwyl die tuinwerker / huishulp daar gaan werk? Dit is mos nou vir moeilikheid soek. Meeste mense maak hulle diere kwaai groot om hulle familie & huise op te pas? Ek het 8 worshonde & 1 lab-boerboel kruis. Hulle het groot geword met my tuinwerk & huishulp MAAR as hulle kom werk is daar altyd iemand by die huis. Ek los nooit my diere alleen by die huishulp of tuinwerker nie.

Marlene

Ons kwaai hond word toegemaak as iemand iets moet doen by ons. Leer ASB uit ander se ‘foute’

Swerwer

Die tuinwerker/huishulpe is bekend aan die diere en ongelukkig kan daar die diere nie geoordeel word nie. Waarom die diere skielik ‘n persoon sal aanval, bly onbeantwoord want niemand was tuis tydens so ‘n voorval nie. Moet asseblief nie ‘n voorval van diere opblaas nie, want dan is die werkers wat hul werkgewers vermoor na hul jare reeds by hul werk net so skuldig soos hierdie onskuldige diere wat daar is om hul huishoudings te beskerm.

Martie

Ek wonder wanneer word mense wat moor ook van kant gemaak as hulle iemand dood maak.

quartus

As jy gevaarlikw diere aanhou rus daar n verpligting op jou om seker te maak dat die diere nie mense kan aanval en verskeur/doodmaak nie