Honderde beset Vrystaat-boer se plaas

‘n Foto van die klag wat by die polisie aanhangig gemaak is. Foto: Verskaf.

Sowat 600 grondbesetters het Maandagoggend by ʼn plaas net buite Virginia in die Vrystaat opgedaag, veld begin brand en erwe uitgemeet.

Kol. Thandi Mbambo, provinsiale polisiewoordvoerder, het gesê die besetters het omstreeks 08:00 by die plaas Christiana, wat aan Andries Pienaar behoort, opgedaag en die veld aan die brand gesteek. “Die boer het die polisie in kennis gestel en lede van die openbare orde-polisie, genoeg om met daardie skare af te reken, is na die toneel ontplooi,” het Mbambo gesê.

Mbambo het gesê ‘n aantal mense is in hegtenis geneem op aanklag van betreding ná hulle die pad na Meloding met vullis versper het toe die polisie hulle van die plaas verwyder het. Sy het die situasie as “gespanne” beskryf en gesê die polisie gaan voort om die gebied te monitor.

Volgens haar is dit onduidelik van waar die mense afkomstig is, maar is dit moontlik dat hulle van die plaaslike aangrensende Meloding-nedersetting afkomstig is.

Johan Terblanché, brandbeskermingsbeampte van die omgewing, het laat Maandagmiddag aan Maroela Media gesê toe hy ʼn uur vantevore weg is by die toneel was die besetters nog daar.

“Hulle staan so 200 tot 300 meter uitmekaar. Daar is nog geen strukture opgerig nie, maar ek vermoed hulle gaan dit vanaand kom doen.”

Terblanché het gesê tussen 200 en300 ha se goeie rooigrasweiding is afgebrand. Volgens hom het Pienaar ʼn klag van betreding by die polisie aanhangig gemaak alvorens die openbare orde-polisie by die toneel opgedaag het.

Daar word beweer ʼn raadslid het die inwoners toestemming gegee om die grond te beset.

Volgens Terblanché kon die brand suksesvol bestry word met die hulp van ʼn groepie boere en het hul nuwe brandbane ook gebrand.

“Hierdie dinge gaan al hoe meer gebeur en mens moet dit mooi en versigtig hanteer deur die regte wetlike kanale,” het Terblanché gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

92 Kommentare

jongste oudste gewildste
Hein

As dit meer gereeld gaan gebeur, hoe gaan die openbare orde polisie op verskillende plekke kan keer? As dit landwyd gelyktydig gebeur?

Irma

Seker deel vd plase wat deur die ANC ge-oormerk is vir onteiening. Ek het vanoggend by ‘n petrol joggie gehoor dat ons bekommerd moet wees want die deksel op die pot is nogsteeds ‘n deksel wat die pot goed pas. Menende ons huidige president en sy uitlatings.

Mag

Dit is wat hul met die plase gaan maak wat hul kry, verkoop ‘n stukkie vir ‘n duisend rand en slaan duisende plakkershutte daarop. Dit gaan nie bewerk word vir boerdery nie. Hoe hartseer dat ons land tot so ‘n vlak gaan verval.

Adam

Lyk vir my die groot Afrikaner groeperings het geskitter in hul afwesigheid.

Koos

Mnr die President, u beter baie vinnig die volgende op openbare media, wat deur die ANC beheer word, naamlik alle TV kanale van die SABC, aan die mense van hierdie land oordra: Dat u persoonlik by verskeie geleenthede die versekering gegee het dat geen grondgrype links en regs sal plaasvind nie en dat orde en wet ten alle tye gehandhaaf sal word. Mnr Ramaphosa, dit is uit-en-uit jou verantwoordelik teenoor alle mense wat hierdie land bewoon. Sien asseblief toe dat dit so spoedig moontlik wyd en syd bekend gemaak word vir almal om daarby te hou. Daarsonder gaan die gevolge… Lees meer »