Kaap se eerste kouefront op pad

Foto: https://pixabay.com

Inwoners van die Wes-Kaap kan binnekort effens koeler weer verwag met die eerste sneeu vir die winter wat ook op plekke in die Kaapprovinsies kan val.

Volgens Lehlohonolo Thobela, ʼn woordvoerder verbonde aan die Suid-Afrikaanse Weerdiens (SAWD), sal ʼn ligte kouefront die Wes-Kaap teen Vrydag tref.

Inwoners van die provinsie kan teen Saterdag kouer en nat weersomstandighede verwag.

“Teen Sondag sal temperature in dele van die Oos- en Noord-Kaap ook effens daal. Geïsoleerde reënbuie sal ook na verwagting in dié provinsies uitsak,” bevestig Thobela.

Die kouefront sal ook sneeu in hoogliggende gebiede van die Kaapprovinsies en Drakensberge teweegbring.

In die sentrale en noordoostelike dele van die land kan inwoners teen Sondag ook geïsoleerde reënbuie verwag.