Kerkgroep hof toe oor verpligte inentings

Foto bloot ter illustrasie. (Foto: Thomas Lohnes / AFP)

Die kerkgroep South African National Christian Forum (SANCF) het hofstukke by die Konstitusionele Hof ingedien met die doel om verpligte inentings in Suid-Afrika stop te sit.

Hulle hoop ook om met dié regsaksie ʼn einde aan die algehele inperking te maak.

SANCF word deur Schalk van der Merwe, ʼn arbeidsregkenner en menseregteaktivis, bygestaan.

SANCF en Van der Merwe meen verpligte inentings is ʼn growwe skending van menseregte wat tot op die hoogste vlak beveg moet word.

Die respondente in die saak is die president van Suid-Afrika en die ministers van samewerkende regering en tradisionele sake, gesondheid, arbeid en justisie.

Van der Merwe staan SANCF onder meer by met die insameling van getuienis en die voorbereiding van regsargumente.

Schalk van der Merwe is ʼn arbeidsregkenner en menseregteaktivis. (Foto: Facebook)

“Ek is nie ʼn sogenaamde anti-vaxxer nie. Ek het nie ʼn probleem met die toedien van veilige, beproefde entstowwe nie. Ek is ʼn pro-regte-aktivis. Jy kan nie menseregte met ʼn mediese ingryping aantas nie.”

As arbeidspesialis hanteer Van der Merwe ook verskeie mediasie‑ en arbitrasie (CCMA)-verwante sake van werknemers wat weens gedwonge inentings – spesifiek teen Covid-19 – afgedank is.

“Ek oordryf nie as ek sê ek word oorval deur duisende klagtes van menseregtemisbruike en gedwonge inentings nie.”

Maroela Media het in Junie vanjaar berig dat werkgewers ʼn beleid mag instel wat vir verpligte inentings teen die koronavirus voorsiening maak.

Verskeie ondernemings en universiteite het sedertdien aangedui dat hulle wel dié roete gaan volg. Onder dié is Old Mutual, wie se verpligte inentingsbeleid in Januarie 2022 in werking tree. Discovery het ook vroeër vanjaar aangedui dat hulle so ʼn beleid sal instel.

Van der Merwe sê hy het ook honderde klagtes van entstofverwante gesondheidsprobleme ontvang, wat wissel van erge hoofpyne tot ernstige siektetoestande soos die ingee van organe en selfs sterftes wat glo met Covid-19 entstof verband hou.

Die kerkgroep South African National Christian Forum (SANCF) het hofstukke by die Konstitusionele Hof ingedien met die doel om verpligte inentings in Suid-Afrika stop te sit.

“Daar is soveel gevalle dat ons dit na ander prokureursfirmas sal moet uitplaas, bloot omdat dit te veel vir een of twee prokureurs is om te hanteer.”

Volgens Van der Merwe is daar veral ʼn hoë voorkoms van ernstige newe-effekte van entstof in Secunda, Mpumalanga.

“Hierdie sake moet so vinnig as moontlik gedryf word sodat daar ʼn einde aan gedwonge inentings gebring kan word.”

Van der Merwe sê die regering het boonop al by verskeie geleenthede onderneem om geensins wetgewing in te stel wat inentings sal verplig nie.

Hy sê hulle het reeds ʼn saaknommer ontvang, maar dat dit waarskynlik nog ʼn rukkie sal wees voordat die saak op die hofrol geplaas word.

“Ek doen ʼn beroep op alle mense in die land – ingeënt of nie – om ons saak te steun. Dit gaan oor baie meer as die neem van ʼn inenting. Dit gaan oor menseregte.

“Dis in belang van elke landsburger om gedwonge inenting teen te staan. Dis elkeen se volle reg om self ʼn ingeligte besluit te neem oor of hulle die entstof teen Covid-19 wil ontvang of nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

22 Kommentare

jongste oudste gewildste
Nicolaas Hendrik

In die kol Scalk, dankie

Anel

Dankie Schalk. Iemand met gesonde verstand. Jy het my ondersteuning 100%.

LIEZL

Stem saam of stem nie saam nie. Dis jou eie keuse. En niemand kan enigeen dwing tot enigiets nie. Ek het niemand aangemoedig om die ‘inenting’ te kry nie. Hoekom moet daar nou iets op my afgedwing word? In die laaste jaar het ek meer mense sien doodgaan aan ander siektes en probleme. Dit word nie genoem nie. Kanker, Diabetes, hartsiektes, ongelukke, selfmoord, moord. Waar is hierdie statistieke?

Charl Albertus

In Namibië is daar ook ‘n aksie groep teen verpligte entings. Die word gedryf, onder ander, deur dokters, regsgeleerdes, plaaslike politikuste, ens.

Gevaar is dat as die staat een van jou regte vat, wat vat hulle môre.

Samuel

Schalk van der Merwe doen die regte ding. Beproefde inentings is een ding, maar Covid-19 inenting is nog in proef fase. Gedwonge inentings is boos.