Knysna-brand: Gesin sterf toe hulle vlug

Tony, Madré en Michael Johnston. Foto: Facebook

Die polisie het bevestig die drie mense wat Woensdag in die verwoestende brand in Knysna gesterf het, was ʼn jong egpaar en hul seuntjie.

Kapt. Malcolm Pojie, woordvoerder van die polisie, het gesê die polisie se honde-eenheid is omstreeks 11:50 na die toneel tussen Sedgefield en Karatara ontbied. “ʼn Man, vrou en kind se liggame is in die veld ongeveer 50 m van hul woning aangetref. Dit lyk asof die drie mense probeer het om van die brand te vlug, maar toe deur die rook en vlamme oorval is,” het Pojie gesê.

Hy het gesê die gesin se huis en voertuie is heeltemal in die brand verwoes. Volgens Pojie was die man 30 jaar oud en sy vrou 28.

Pojie wou nog nie die oorledenes se name bevestig nie. Hulle is egter intussen op sosiale media as Tony en Madré Johnston en hul seun, Michael, geïdentifiseer. Pojie het gesê die voorval word deur die polisie ondersoek. Hy het gesê die polisie is bewus van bewerings dat die vrou swanger was, maar het gesê dit kan nog nie bevestig word nie.

James-Brent Styan, woordvoerder van die minister van plaaslike regering en omgewingsake, Anton Bredell, het Donderdagoggend gesê daar word humanitêre steun aan tussen 8 000 en 10 000 inwoners van die groter Knysna-gebied gegee. Hy het gesê die woonbuurte wat die ergste deur die brande geraak is, is onder meer Brenton-on-Lake, Brenton-on-Sea, Knysna Heights, Brakenhill, Belvedere Heights, Greenfield, Eastford en Jood se Kamp. Volledige evaluering van die skade word deur die loop van die dag gedoen.

Teen laat Donderdagoggend was brandbestryders steeds besig om die brand te blus. “Berigte van sommige mense wat ontruim is wat besig is om na die ontruimde gebied terug te keer, is ʼn saak van kommer. Dit word nie aanbeveel nie en plaas ekstra druk op die nooddienste wat tans op die toneel besig is,” het Styan gesê. “Inwoners sal in kennis gestel word wanneer dit veilig is om na die gebiede wat vroeër ontruim is, terug te keer.”

Styan het gesê die Stad Kaapstad Metropolitaanse Munisipaliteit het intussen bevestig ongeveer 827 informele behuisingstrukture is tydens gister se storm verwoes. Humanitêre steun word aan 2 502 mense oor die hele munisipale gebied gegee. Daar word ook tans aandag geskenk aan die verskeie kragonderbrekings in die stad.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

70 Kommentare

jongste oudste gewildste
Anton

…ai…sterkte aan almal…en dankie vir al die mense wat help…

A

So hartseer!!

Stella

Dis nou tragies,siestog om so dood te gaan moes erg gewees het,,wonder wat het deur die ou seuntjie se kop gegaan daai vreeslike oomblik,hy het nie verstaan wat aan die gang is nie! Baie jammer om soiets te hoor

Lou

Baie jammer … op die foto lyk hulle baie gelukkig. Pragtige mense.

Hannetjie

Genade maar dit is sad…Wat n pragtige gesin om so te moet sterf. .mens kan net wonder Wat die verskriklike brande veroorsaak het. .RIP