Kriminele rekord- sentrum weens ‘wanbetaling’ gesluit

Suid-Afrikaners in die land sowel as in die buiteland is in die knyp oor die polisie se kriminele rekord- sentrum tans gesluit is. (Foto: Facebook / CouncilAssist for Educators)

Suid-Afrikaners in die land sowel as in die buiteland is in die knyp oor die polisie se kriminele rekord- sentrum tans gesluit is, glo weens ʼn “betalingsdispuut”. Dít ná die sentrum reeds etlike maande ʼn agterstand met die uitreik van polisieklaringsertifikate ervaar.

Aansoekers en koeriers het die afgelope week voor dooiemansdeur te staan gekom toe hulle klaringsertifikate by dié sentrum in Francis Baardstraat in die Pretoriase middestad wou afhaal.

’n Polisieklaringsertifikaat is ’n amptelike dokument wat deur die kriminele rekord- en misdaadtoneelbestuursentrums uitgereik word en dui aan of enige strafregtelike skuldigbevindings teen ’n individu aangeteken is of nie.

Dit laat onder andere werk-, visum-, vuurwapenlisensieaansoekers asook kriminele ondersoekers met  ʼn reusedilemma.

Die polisie het egter nog nie op Maroela Media se navrae gereageer oor of die sentrum wél weens ʼn betalingsdispuut gesluit is nie. Dit is ook nie duidelik wanneer die sentrum sy bedrywighede sal hervat en wat die omkeertyd sal wees nie.

Die polisie se kennisgewing op sy webwerf sê bloot dat die sentrum tans ʼn agterstand ervaar en dat daar onverpoosd gewerk word om die agterstand op te klaar.

Maroela Media het van ʼn bron in Nieu-Seeland verneem dat Suid-Afrikaners wat in dié land woon uiters bekommerd is oor die hernuwing van hul klaringsertifikate vir visumdoeleindes. Die bron werk vir ʼn maatskappy wat Suid-Afrikaanse kliënte met aansoeke vir klaringsertifikate bystaan.

“Die kriminele rekord- sentrum in Pretoria is die enigste plek in Suid-Afrika wat dié diens kan lewer.

“Dinsdagoggend het een van ons kliënte se familielede daarheen gegaan om ʼn klaringsertifikaat te gaan afhaal, net om te vind dat die deure gesluit is omdat die polisie nie huur betaal het nie. Daar was groot rooi plakkers op die deure wat sê ‘gesluit weens onbetaalde huur tot verdere kennisgewing’.

“Nou is ons in ʼn groot penarie. Die aantal aansoeke wat deur ons maatskappy ingedien is, het die mense in Nieu-Seeland op hol aangesien hul aansoeke vir verblyfreg van dié klaringsertifikaat afhanklik is.

“In Nieu-Seeland mag jy ook nie ʼn dag langer as die datum op jou visum in die land wees nie. Hoe nou gemaak en wat gebeur verder?” het die bron in ʼn boodskap aan Maroela Media gesê.

Sentrum ervaar ‘vele uitdagings’

Andrew Whitfield, die DA se woordvoerder vir polisie, sê agter dié geslote deure skuil verdere uitdagings wat die uitreik van klaringsertifikate in die wiele ry.

Volgens Whitfield moet die geoutomatiseerde vingerafdrukidentifiseringstelsel vervang word, en kan vingerafdrukke nie daarsonder verwerk word nie.

Bheki Cele, minister van polisie, het dit in November verlede jaar in terugvoer op parlementêre navrae aan die DA bevestig. Ander redes wat vir die agterstand aangevoer word, is die Covid-19-pandemie, verhoogde aantal aansoeke en te min personeel, stelselprobleme weens beurtkrag en prosedurele veranderings in die aansoekproses.

Teen November kon die sentrum sowat 25% van die aansoeke nie binne 15 werkdae verwerk en uitreik nie.

Whitfield sê dit skep reuseprobleme vir mense wat reeds oorsee is, wil emigreer of na die buiteland reis. Dit skep ook uitdagings met die aanstel van werknemers waar polisieklarings ʼn voorvereiste vir die sodanige pos is. Volgens Whitfield lei dit uiteraard tot risiko’s dat mense in die openbare en private sektor aangestel word sonder dat polisieklarings afgehandel is. Dit maak dit ook moeilik vir mense om aanbiedings in Suid-Afrika en die buiteland te aanvaar.