Lasbrief vir Malema uitgereik

‘n Skermgreep uit die video wat wys hoe EFF-leier Julius Malema in Mdantsane in die Oos-Kaap glo met ‘n aanvalsgeweer losbrand.

Die Oos-Londense landdroshof het ʼn lasbrief vir die inhegtenisneming van EFF-leier Julius Malema uitgereik.

Malema moes Maandag in dié hof verskyn nadat hy glo in 2018 ʼn vuurwapen by ʼn EFF-saamtrek in die provinsie afgevuur het.

Die burgerregtegroep AfriForum het destyds die klagte teen Malema en Adriaan Snyman, ʼn veiligheidswag, aanhangig gemaak. Die organisasie het ook deurlopend druk op die Nasionale Vervolgingsgesag (NVG) geplaas om ʼn besluit oor Malema se vervolging te neem.

Malema staan tereg op vyf afsonderlike klagte nadat hy glo die skote met ʼn aanvalsgeweer by die EFF se vyfjaarfeesviering in Mdantsane in die Oos-Kaap afgevuur het. Die klagte behels die onwettige besit van ʼn vuurwapen, die onwettige besit van ammunisie, die afvuur van ʼn vuurwapen in ʼn beboude gebied of openbare plek, versuim om redelike voorsorgmaatreëls te tref om mense en eiendom te beskerm en die roekelose bedreiging van mense en eiendom.

Snyman, die sekerheidswag wat die vuurwapen vir Malema aangegee het voor dit afgevuur is, staan tereg op twee klagte, naamlik versuim om redelike voorsorgmaatreëls te tref om mense en eiendom te beskerm en die verskaf van ʼn vuurwapen of ammunisie aan enige persoon wat nie toegelaat word om dit te besit nie.

Snyman is na bewering die eienaar van ʼn private sekerheidsmaatskappy wat tydens die voorval dienste gelewer het aan die EFF. In beeldmateriaal van die voorval lyk dit of Snyman die geweer aan Malema oorhandig.

Luxolo Tyali, NVG-woordvoerder in die Oos-Kaap, het Maandag gesê die lasbrief sal tot Malema se volgende hofverskyning op 8 Mei oorstaan.

“Die verdediging is vandag met die inhoud van die dossier voorsien. Sy [Malema se] regsverteenwoordiger sal daarna verdere aanwysings by hom kry. Die nasionale direkteur van Openbare Vervolgings moet dan besluit of ʼn verhoor sal begin. Daar is ander kwessies waaroor nog besluit moet word, maar dit is nou húlle skuif,” het Tyali gesê.

Tyali het benadruk dat die lasbrief ʼn prosedurele kwessie is en nie beteken dat die polisie nou na Malema gaan soek nie. Malema het die hof wel vooraf ingelig dat hy nie vandag teenwoordig gaan wees nie.

Tyali het gesê dit is standaardgebruik om dit te doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Misky

Ag dis belaglik en dit beteken dat n lasbrief deesdae nie die papier werd is waarop dit getik is nie.

Versuim om in die hof te verskyn verdien n waardige “lasbrief”, inhegtenisname en tronk toe met jou bas tot jou volgende hofdatum.

Jan

Kan enigiemand maar net laat weet hy voel nie vandag lus vir die hof nie en dan’s dit reg? Of net Zuma en Malema?
Wat n klug het ons regstelsel nie geword nie.

Chris

Die sirkus toertjies gaan onverpoosd voort. Die probleem is die narre is lankal nie meer snaaks nie maar is erg irreterend.. Wag in spanning om te sien wat die gevolge vir die nar gaan wees, indien enige. Doen jy iets aan hom, word hy ‘n martelaar. Doen jy niks word hy ‘n held.

VanAfrika

MM hy het nie “GLO” die vuurwapen gevuur nie, hy “het” die vuurwapen gevuur want ek het die video gesien hoe roekeloos hy die vuurwapen afvuur.

Bloedhond

Maandag is hy uit op borgtog van R300 of iets dergliks soos ‘n siekbrief van ‘n onbekende siekte!