‘Los Magashule uit,’ sê ANC ná mediaberigte

ANC-sekretaris-generaal Ace Magashule (Foto: Itumeleng English/ANA)

Die ANC het Sondag vinnig sy sekretaris-generaal Ace Magashule verdedig ná hy in mediaberigte onder andere van korrupsie beskuldig is en dat hy aan die hoof staan van ʼn goedgeorganiseerde staatskapingnetwerk.

Pres. Cyril Ramaphosa en “die hele leierskap van die ANC”, spesifiek die topses, lei ʼn hernuwing van die ANC en die breër Suid-Afrikaanse samelewing, het die party in ʼn verklaring gesê.

“As die ANC het ons reeds openlik erken dat ons foute gemaak het en ons het onsself die opdrag opgelê om die ANC weer te laat opstaan. Ons het die ander wang gedraai toe die media en ander opponente van die ANC doelbewus sekere leiers van die ANC aangeval en twyfel versprei het oor die eenheid en doel van die leierskap. Die volwassenheid wat die ANC getoon het, is egter nie aan ons terugbetoon nie. Dit lyk eerder of ons goeie aard misbruik word. As die ANC en die leierskap word ons nou moeg daarvoor.”

Die ANC het gesê die jongste berigte in Sondag se Sunday Times en City Press oor Magashule is ʼn “goedgekoördineerde media-aanval”. “Die inhoud van die voorbladstories in albei koerante is byna identies en daar is selfs paragrawe met presies dieselfde bewoording. Dit is gebaseer op ʼn tipiese stratcom-tipe fopnuusboek deur Pieter-Louis Myburgh, met die sensasiewekkende en belaglike propaganda-opskrif, ‘Gangster State – Unravelling Ace Magashule’s Web of Capture’ [Rapport: “Ace ‘steel by jou, gee dit vir ANC’ – Skokboek betrek ANC se sekretaris-generaal by nes van bedrog”].”

Aldus die verklaring is Myburgh reeds sedert 2016 besig “om leuens oor die sekretaris-generaal te versprei”. “Ons beskou dié boek nou as die kroon van dié leuens.

“Die tydsberekening van die publikasie van dié fopnuusstories en die twyfelagtige boek waarop dit gebaseer is, is skaars ʼn maand voor die algemene verkiesing op 8 Mei om die grootste hoeveelheid skade teen Magashule aan te rig. Dit is duidelik die openingsalvo in ʼn sorgvuldig beplande operasie wat oor die volgende paar dae en weke teen die ANC en Magashule sal ontvou.”

Die ANC het gesê hy beskou “hierdie persoonlike en wrede aanval” op die sekretaris-generaal as ʼn “direkte en goedberekende aanval nie net op die persoon van die sekretaris-generaal nie, maar die kantoor van die sekretaris-generaal, die administratiewe enjinkamer van die ANC wat noodsaaklik is vir ons verkiesingsveldtog”.

“Dis duidelik die sekretaris-generaal van die ANC, as die uitvoerende hoof van die ANC, is die teiken. Hierdie aanvalle het ten doel om die ANC se verkiesingsveldtog te ondermyn en die ANC oor die algemeen te verswak. Dit moet ook nie in isolasie beskou word van ander propaganda-aanvalle wat teen talle ANC-leiers van stapel gestuur is nie (spesifiek diegene wat op die ANC se kandidaatlys voorkom) en bewerings teen ander nasionale ampsdraers (topses) van die ANC.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Johan

Los Mnr M uit! Ongeag wat hy doen, gedoen het of gaan doen. Los hom uit want hy is mos “untouchable”. Hier is tweede Zuma oppad. “Make way”

ChrisE

Ek weerhou my gewoonlik aan politiekery vernaam wanneer dit op die huidige regime betrekking het. Ons wittes moet ons uit die swartman se “poitiek” hou. Dit is nie volgens die “spelreëls en etiek” van die westerse demokratiese beginsels nie. Daardeur sê ek nie dat die westerse politiekery enigsins bo verdenking staan nie. Ons wittes sal nie die Afrikaan se politiek die volgende 500 jaar vervang en of verander nie. Ons wittes moet sit, sluk die wang draai en ander kant toe kyk. Ons sal nie hond haar afmaak met enige blootstelling van enige vergrype of wandade van die politieke bestel… Lees meer »

Tobie

Julle is reg ANC, dis alles slim beplan, EN gebaseer op feite – wat is fout daarmee?

Gert van Wierdapark

Stem saam met hul spinstories. Hul het volwassenheid bereik in die plundering van SA. Ace is die Joker in die pak, maar die a en see se bluf gaan nie werk nie. Hoewel hul die mooi broodjies bak en dit nogal glo ook, sal die wiel draai en dan die See en A se stemvee en die res van die vrye wereld se oe dalk betyds oopgaan!

Jo B

Dit klink vir my, daar is ‘n slang in die gras. Weet Ace nie dalk meer as wat ons dink nie. Die ANC beskerm hom om nie met die sak patats uit te kom nie. Almal van hulle keer en beskerm hom as sy naam genoem word…. nogal opvallend… neh. Maak my bietjie wonder ?