Mabuza ontwykend oor grondkwessie

Pres. Cyril Ramaphosa en adjunkpres. David Mabuza (Foto: GCIS)

Adjunkpres. David Mabuza het Dinsdag tydens vraetyd in die parlement ʼn eierdans oor die onteiening van grond sonder vergoeding gedoen.

In ʼn sterk aanduiding dat die ANC ʼn tydperk van onsekerheid oor die verdelende kwessie ervaar, het Mabuza wegbeweeg van die ANC se aanvanklike bombasme oor onteiening en ʼn versigtiger koers ingeslaan.

Hy het die versekering gegee dat alle insette oor die politieke warm patat in ag geneem sal word voor die finale besluit oor die kwessie.

ʼn Vraag deur die DA oor die erkenning van titelaktes op kommunale grond wat deur tradisionele leiers beheer word, het gewys watter hoogspanning tussen die regering en tradisionele leiers aan die broei is oor die aangeleentheid.

“Tradisionele leiers bestuur die grond namens die bevolking, so dit behoort eintlik aan die bevolking. Om dieselfde rede behoort staatsgrond ook aan die bevolking,” het hy probeer argumenteer.

Veronica Mente, EFF-LP, het Mabuza getakel oor vertragings met die verskaffing van vigs-toetsuitslae en aflewering van antiretrovirale middels in afgeleë gebiede. Mabuza het gesê die regering doen sy bes, maar dit vat ʼn rukkie om aflewerings van bloedmonsters na bloedlaboratoriums te doen omdat die laboratoriums in stedelike gebiede is.

ʼn Vraag deur die DA-hoofsweep, John Steenhuisen, oor ingryping van die sentrale regering in Noordwes het korrupsie aan die bod gebring, en dis toe dat die poppe begin dans het.

Andries Tlouamma, Agang-LP, het gevra dat Mabuza homself van enige ondersoek na korrupsie verskoon “want u is Supra Mahumapelo [die ontsetelde Noordwes-premier] se broer in aksie. Dit sal een dief wees wat ʼn ander een jaag.”

Die adjunkspeaker, Lechesa Tsenoli (ANC), het Tlouamma beveel om sy woorde terug te trek, maar Tlouamma het geweier en is uit die vergadersaal gejaag.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Frikkie Geld en huis

Andries Tlouamma het die spyker so op die kop geslaan. Mooi man !!!!!

Corné de Milander

Dit is vir my heerlik om enige tyd (maar veral soggens vroeg voordat my dagtake begin) Maroela Media “nader te skuif” en die belanrikste nuus in my taal te kan lees. Ek sou graag minder van motorongelukke, moorde, verkragtings en politieke kwessies wou sien. Interessante aktuele sake sal my dag kan opkikker!

ferdi

Begin met CR se groot plase en Ace Magashule se plaas en bai grond en eiendom wat hulle besit

John

‘n Sterk aanduiding van onduidelikheid…. ha, ha! Hoe lank woon jy al in SA? En die ANC het verander? Dalk kook die water nog net nie warm genoeg nie…

Hendrik

Ons, die wittes se politieke toekoms le in die swart stem se hande. Ons is eenvoudig net te min om enige verandering in politieke rigting af te dwing. Ons kan natuurlik al ons energie en geld weg skuif vanaf DSTV en regtig hard werk om meerderheid enklawes te vestig om te oorleef.