Man (57) op plaas doodgeskiet

Jasper von Kleist. Foto: Via Facebook

ʼn 57-jarige man is Woensdagaand tydens ʼn aanval op ʼn plaas in die Tom Burke-omgewing, noord van Lephalale (Ellisras), in Limpopo doodgeskiet.

Brig. Motlafela Mojapelo, woordvoerder van die Lephalale-polisie, het by navraag aan Maroela Media bevestig die oorledene, Jasper von Kleist, ʼn plaasvoorman op die Dale-plaas, is omstreeks 20:30 in sy huis doodgeskiet.

“Die oorledene het saam met sy lewensmaat in hul huis gerus toe ʼn onbekende gewapende man op hulle geskiet het,” het Mojapelo gesê.

Die verdagte het Von Kleist noodlottig gewond, en sy vriendin, Sonja Joubert (55), in haar arm gewond. Von Kleist is deur paramedici op die toneel dood verklaar. Joubert is per ambulans na ʼn nabygeleë hospitaal geneem en is reeds ontslaan.

Die plaaseienaar, Nico Solomon, se 34-jarige seun, Charlie, is ook tydens die aanval gewond. Volgens die polisie is die 34-jarige slagoffer [Charlie] deur ʼn ander verdagte by die hoofhuis op die plaas geskiet.

Maroela Media het by ʼn betroubare bron verneem Charlie het by sy pa gaan eet en was op pad terug na sy huis, nie te ver van sy pa s’n af nie, toe hy deur twee of vier verdagtes buite die huis oorval is.

“Hy is na sy bakkie toe om huis toe te ry. Sy hondjie het in die rigting van die blombedding geblaf en wou nie in die bakkie klim nie. [Charlie] het sy pistool en selfoon op die sitplek neergesit om die hond op te tel toe twee verdagtes opspring en hom in die been skiet,” het die bron, wat verkies om anoniem te bly, gesê.

Charlie het terug na sy pa se huis gehardloop en die deur gesluit. Dit is toe dat die verdagtes na Von Kleist se huis is. Die aanvallers het glo slegs met Von Kleist en Joubert se selfone te voet op vlug geslaan.

Joubert het Woensdag die bloedige toneel aan afgevaardigdes van die VF Plus gewys en gesê dit het nie gelyk of die aanvallers iets wou roof nie, maar of hulle net die mense op die plaas voor die voet wou doodskiet.

Sy is twee keer raakgeskiet. Een skoot is deur haar arm en die ander deur haar skouer.

Marcelle Maritz, VF Plus-provinsiale leier in Limpopo en Sonja Joubert. Foto: Verskaf

ʼn Uiters emosionele Joubert het aan Marcelle Maritz, VF Plus se provinsiale leier in Limpopo, verduidelik sy en Von Kleist het gesit en televisie kyk toe hulle skote buite gehoor het.

“Jasper het opgespring en op daardie oomblik het van die mans deur die voordeur op ons begin skiet. Die deur het glasvenstertjies en hulle kon ons binne sien. Nadat die eerste skoot my getref het, het Jasper voor my ingespring en hy is in die bors geskiet,” het Joubert gesê.

“Nog ʼn skoot het my getref en ons het geval, met Jasper wat half oor my gelê het. Ek het gehoor hoe hy roggel. Toe hou die roggel op en ek voel hoe hy ophou asemhaal. Toe weet ek hy is dood.”

Joubert het gesê die aanvallers het niks gesê en niks gevra nie. “Hulle het net van buite op ons geskiet. Dit was of hulle ons net wou doodmaak, niks anders nie…”

Volgens die VF Plus het honderde boere van die omgewing die polisie Woensdagoggend gehelp met die soektog na die aanvallers. ʼn Helikopter en ligte vliegtuig is ook gebruik.

Die Tom Burke-polisie ondersoek die voorval. Niemand is nog in verband met dié voorval in hegtenis geneem nie. Enigiemand met inligting wat die polisie in hul ondersoek kan bystaan, word versoek om kapt. Richard Boshomane by 079 894 5501 te kontak.

Von Kleist was die oom van Zelna Zeekie, wat Donderdag die nuus oor sy moord op Facebook bekend gemaak het.

“My kosbare oom is gisteraand tydens ʼn plaasaanval vermoor. Ek het net gister met my oom gepraat en die dag voor dit. Ek haat hierdie plaasmoorde nou met ʼn passie. Rus in vrede my geliefde oom,” het sy geskryf.

Ian Cameron, AfriForum se hoof van gemeenskapsveiligheid, het Donderdag aan Maroela Media gesê met dié voorval ingesluit, het daar vanjaar reeds sowat 113 plaasaanvalle en 17 plaasmoorde in Suid-Afrika plaasgevind.

Dr. Pieter Groenewald, leier van die VF Plus, is tans in Brussel, België, waar hy plaasaanvalle en onteienings sonder vergoeding met verskeie mense en groepe soos Unpo (Unrepresented Nations & Peoples Organization)  en die Vlaamse Belang Jeugaksie (in Gent) gaan bespreek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

48 Kommentare

jongste oudste gewildste
Callie

Baie sterkte aan al die familie. As daar nog witmense oor is wat in Ramaphosa en die tandmuis glo, word wakker. Dit is al te laat. Dit gaan openlik daaroor om witmense te jag, plase leeg te kry en dan te onteien

Francois

Dis stelselmatige uitwissing van die blanke boer, PUNT!
Hierdie moorde is nie sporadies nie – dis ondergronds georganiseerd se ek jou!
Zimbabwe deja vu!

Mag sy familie krag en rus vind!

Dirkie

Ja reg. Hulle loop op vrye voet rond en ander word in aanhouding gehou. Nou vra ek net.

MJL

………en die President van hierdie droewige land is stil. Tjoepstil.

Linda Gouws

Nee kyk, so kan dit nie aangaan nie! Dis skokkend verby!!