’n 47-jarige man wat sy vrou glo verlede Sondag by hul huis buite Marble Hall in Limpopo vermoor het, is vandeesweek in hegtenis geneem nadat hy homself aan die polisie oorgegee het.
Volgens die polisie is sy vrou, Moloto Winniefred Mabotja, ’n 41-jarige paramedikus, met ʼn panga doodgekap. Die egpaar het in die Shushumela- informele nedersetting gewoon.
A very sad day 4 us.41yrs old mother of a 1yr old, Advanced life supporter,Paramedic a life saver &scares skills resource died allegedly in the hands of the one who is suppose to love her,her husband The pain of gruesome murder of Winnie Mabotja Matlou is unbearable RIP???????????????? pic.twitter.com/Njun32u4K4
— Dr Phophi Ramathuba (@PhophiRamathuba) November 7, 2022
Kol. Malesela Ledwaba, polisiewoordvoerder, sê die man het homself ʼn dag ná Mabotja se dood by die Lydenburg-polisiestasie in Mpumalanga oorgegee.
“Die verdagte het die polisie ingelig dat hy sy vrou die vorige aand doodgemaak en haar in die huis toegesluit het,” het Ledwaba gesê.
“Die Elandskraal-polisie is onmiddellik gekontak en die verdagte het die polisie na die huis geneem waar die oorledene se liggaam met verskeie beserings aangetref is. Die bebloede panga het langs haar liggaam gelê.”
Die motief vir die moord is in dié stadium onduidelik. Ledwaba sê huishoudelike geweld kan nie uitgeskakel word nie.
Lt.genl. Thembi Hadebe, provinsiale polisiekommissaris, het haar kommer oor voortslepende voorvalle van geslagsgebaseerde geweld uitgespreek, en die publiek gewaarsku om hulle van sulke “barbaarse optrede” te weerhou.
“Dié soort voorvalle is ʼn aanduiding dat daar iets ernstig fout is in ons samelewing. Ons moet saamwerk om te verhoed dat sulke afgryslike goed gebeur.”