Man gevonnis ná hy baba met droë ys brand

Argieffoto bloot ter illustrasie. (Foto: Unsplash/Luma Pimentel)

’n Man wat sy eksmeisie se ses weke oue baba met droë ys gebrand het, is Dinsdag in die Noord-Gautengse hooggeregshof tot 10 jaar tronkstraf gevonnis. Twee jaar van dié vonnis is vir vyf jaar opgeskort. Die voorval het in 2020 plaasgevind.

Volgens Natasha Venter, adviseur by AfriForum se privaatvervolgingseenheid, is Gerhard Viljoen (25) skuldig bevind op aanklagte van aanranding met die doel om ernstig te beseer.

Die eenheid het ingevolge ’n waaksaamheidsopdrag in die saak opgetree. Die kind se biologiese ma is nog nie van enigiets aangekla nie aangesien sy tans steeds minderjarig is.

“Die Nasionale Vervolgingsgesag (NVG) het aanvanklik, ten spyte van oorweldigende bewyse, die klagtes teen die beskuldigde in die Brits-landdroshof teruggetrek.

“Nadat die privaatvervolgingseenheid vertoë aan die direkteur van openbare vervolging (DOV) in Gauteng gerig en aangedui het dat hulle Viljoen privaat wil vervolg, het die DOV egter besluit om wel vervolging in te stel en die saak na die hooggeregshof oor te plaas.”

Venter sê Viljoen het skuldig gepleit en ʼn pleitooreenkoms met die staat gesluit.

Volgens ʼn J-88-vorm het die baba 12 beserings opgedoen. ’n J-88-vorm is ʼn regsdokument wat deur ʼn mediese dokter of geregistreerde verpleegster ingevul word om die beserings wat deur ʼn slagoffer opgedoen is, te dokumenteer.

“Viljoen het erken hy het die baba gebrand deur hom teen die droë ys in sy vrieskas te druk. Hy het ook verskeie beserings aan die baba toegedien deur hom herhaaldelik met die oop hand en ’n roerspaan oor sy hele lyf te slaan.

“Hy het ook erken dat hy die baba op ’n ander geleentheid met ’n vuis geslaan het. Hy wou glo die baba se ma slaan terwyl sy oor haar baba gekniel het. Hy [Viljoen] het erken hy moes voorsien het dat hy die baba sou kon raakslaan.”

Volgens Venter is die NVG tans steeds besig om klagtes teen die biologiese ma te oorweeg. Sy het glo aan ’n kleuterskoolonderwyseres erken dat sy haar baba in ’n vrieskas gesit het wanneer die kind te veel gehuil het.

“Die privaatvervolgingseenheid verwelkom die vonnis teen Viljoen, aangesien sake van geweld teen vrouens en kinders geprioritiseer behoort te word.

“Ons wil ook die aanklaer gelukwens met Viljoen se suksesvolle vervolging. Ons bly egter bekommerd oor die toestand van vervolgings in die Brits-landdroshof waar hierdie saak aanvanklik van die rol geskrap is.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

29 Kommentare

jongste oudste gewildste
Suzette

Die ligte vonnis gaan nie hierdie gemors rehabiliteer of ‘n les leer nie. Duidelik is daar ‘n skroef los.

Swerwer

Verskriklik, die arme klein babetjie verdien nie sulke gedrag nie. Natuurlik moet die ma ook aangekla word, die trauma wat so ‘n kleintjie moet verwerk is verskriklik. Alles as gevolg van kinders wat kinders maak. Hoe op aarde kan hul so ‘n geval van die rol skrap. Iewers is iets nie pluis nie.

Nie Verbaas

Fantasties, hy verdien dit en meer maar as hy swart was was sy vonnis seker in geheel opgeskort.

Chris dupreez

Die vonnis is heeltemal te lig vir wat die man aangevang het.

Annelize

Die afgryse skreeu ten Hemele!!!

Dis “mense” soos die, wat gedwonge sterilisasie moet ondergaan en klaar. Die “Ma” is dan self nog minderjarig, die “pa” 25, wat soek ‘n minderjarige by ‘n 25jarige? Die skroewe is nie net los nie, dit het heeltemal verloor!

Duisende vrouens daar buite sal enigiets onder die son gee om ‘n kindjie van hul eie te kan he, en kyk wat doen die met hulle baba!!!