Man nie welkom by kind se skool ná rassistiese video

Adam Catzavelos. Foto: ‘n Skermskoot uit die video.

Adam Catzavelos, die man wat afgedank is nadat hy neerhalende opmerkings oor swart mense op ʼn video gemaak het terwyl hy met vakansie was, is deur die spogskool  in Johannesburg waar sy seuns skoolgaan, verbied om die skoolterrein te betree.

Die ouers van die skool het Woensdagmiddag ʼn brief van die voorsitter van die skoolraad ontvang dat “een van die ouers” in kennis gestel is dat hy tot verdere kennisgewing nie meer welkom is op die perseel nie weens sy onlangse gedrag op sosiale media. “Dié stappe is gedoen in die beste belange van sy seuns asook alle ander kinders by die skool,” lui die verklaring.

Die skool het gesê weens die optrede van die pa is sy seuns en ander lede van sy gesin blootgestel aan negatiewe publisiteit.

Die skool het dit onomwonde gestel dat hulle alle vorme van rassisme ten sterkste veroordeel en verwerp. “Daar word van alle lede van die skoolgemeenskap, onder wie die ouers, verwag om op ʼn manier op te tree wat in ooreenstemming is met die etos en waardes van ons skool en die Grondwet om te verseker dat ons as goeie voorbeeld vir ons kinders dien.”

Catzavelos is intussen ook deur die DA-Jeug by die Suid-Afrikaanse Menseregtekommissie (MRK) verkla. Dikeledi Selowa, woordvoerder vir die DA-Jeug, het gesê die party veroordeel die “walglike rassistiese video” wat aan die lig gekom het ten sterkste.

Maroela Media het vroeër berig op die video, wat wyd op sosiale media versprei is, kan gesien word hoe Catzavelos op ʼn strand stap terwyl hy met die kamera praat. Volgens Selowa is die video in Griekeland geneem.

Catzavelos neem homself vermoedelik met sy selfoon af en sê: “Ek gaan nou vir jou ʼn weervoorspelling gee: blou lug, pragtige baaie, ongelooflike see, en nie een k****r in sig nie. F****n hemel op aarde. Jy kan dit nie klop nie – jy kán dit nie klop nie.”

“Die gebruik van dié woord is nie net rassisties nie, maar dis ook walglik dat ʼn Suid-Afrikaner wat die verreikende aard van die term besef, dit sal sê en dan met die wêreld op sosiale media deel,” het Selowa gesê.

Selowa het gesê hulle vertrou dat die MRK die kwessie sal ondersoek en Catzavelos verantwoordbaar hou vir sy uitlatings. “Hy het die waardigheid en menseregte van alle Suid-Afrikaners beledig en dit is mense soos Catzavelos wat ons samelewing wil verdeel en wat aangespreek moet word.”

Die DA-Jeug meen Catzavelos en ander wat sy sienings deel, het geen plek in ʼn verenigde Suid-Afrika nie.

Intussen het die restaurant-kettinggroep Braza gesê die opmerkings het Woensdagoggend onder hul aandag gekom.

Andy Papaspyrou, direkteur van Braza, het gesê Braza sal verseker dat hul restaurante, Braza Emperor’s Palace en Braza Silver Lakes, alle sakeverhoudinge met St. George’s Fine Foods met onmiddellike inwerkingtreding staak.

Catzavelos was die bemarkingsbestuurder van St. George’s Fine Foods. Nic Catzavelos, Adam se broer, het Woensdagoggend namens die Catzavelos-familie en St. George’s Fine Foods ʼn verklaring uitgereik waarin hulle bevestig Adam is met onmiddellike inwerkingtreding afgedank. “Die familie van Adam Catzavelos is gewalg deur die betrokke video. Dit is gruwelik en ons distansieer ons van die sienings wat verwoord is. Ons verwerp rassisme in enige vorm,” lui die verklaring.

Die verklaring stel dit verder dat Adam se minderheidsaandeel so gou dit prakties moontlik is van hom ontneem sal word.

“Ons distansieer ons van dié opmerkings en het aan St. George’s Fine Foods gekommunikeer dat ons nie langer enigsins sake met hulle gaan doen nie en ook nie met enige entiteit wat op enige manier met Adam Catzavelos verbind is nie,” het Papaspyrou gesê.

Die burgerregte-organisasie AfriForum het ook op die omstrede video gereageer. Volgens Ernst Roets, adjunk- uitvoerende hoof van AfriForum, moet alle vorme van rassisme veroordeel word, waaronder dié video.

Hy het egter sy kommer uitgespreek oor die growwe inkonsekwente veroordeling van rassisme deur meningsvormers in Suid-Afrika. “AfriForum het reeds 115 strafregtelike klagte ingedien teen mense wat moord en selfs volksmoord teen minderheidsgroepe aanhits. Dit is kommerwekkend dat wanneer daar ʼn wekroep vir geweld teen minderheidsgroepe gemaak word, dit byna geen aandag in hoofstroommedia kry nie. Wanneer ʼn wit mens egter iets aanstootliks oor swart mense sê, word dit gereeld tot ʼn nasionale krisis verhef.”

Die EFF het ook Woensdag ʼn klag teen Catzavelos by die polisie aanhangig gemaak.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

63 Kommentare

jongste oudste gewildste
Dit is pateties

REGTIG BELAGLIK, het julle MALEMA ook VERBIED om by sy kinders se PRIVAATSKOLE op te daag nadat hy die SLAGTING van blankes aangekondig het ?? SJOE Julle is darem pateties. WAT het die skool nou daarmee te doen as ‘n pa sy kinders kom haal? Wie is julle om hom te verbied? Op grond van WATTER WET???

Andries Visagie

Kyk, die man se gedrag was totaal onvanpas, maar hier gaan ons alweer met dubbele standaarde. Word enigeen van die EFF of BLF deur hul werkgewers afgedank, deur hul kinders se skole die terreine belet, of aangekla van diskriminasie of haatspraak? Gaan enigiets gebeur met die hordes wat bejaarde boere nou met die dood dreig omdat hulle nie hulle grond net wil weggee nie? Ja-nee, onse ou piesangrepubliekie.

Belaglik

Ek mis die DA se aanklagtes sowel as die SKOLE se aanklagte en verbod op mnr OTTO se kinders se skool en op die dinge wat hy kwytgeraak het . EK MIS JULLE MENSE! Dis utterly belaglik. Weet julle wat ELKE ouer daar se POLITIEKE mening of siening is? HOEVEEL EFF ondersteuners het julle by die skool wat witmense lewendig gaan AFSLAG??

christa

gelukkig het ek n keuse met wie ek my vereenselwig. Rassisme is mou ‘n groter sonde as moord en verwoesting en diefstal. Wat ‘n grap.

Meneer

Die rasse-padda gaan nou weer getrap word tot hy bars. Hierdie ou was nie baie slim nie..