Man sê jammer ná uitlatings oor wit mense

Velaphi Khumalo. Foto: Via Facebook

Velaphi Khumalo, die man wat gesê het die land moet van wit mense gereinig word nes Adolf Hitler met die Jode gemaak het, het om verskoning gevra vir sy uitlatings.

Die gelykheidshof het in Oktober beslis dat Khumalo se uitlatings haatspraak is ingevolge artikel 10 (1) van die Gelykheidswet en dat Khumalo verbied word om weer dié uitlatings te maak. Khumalo is opdrag gegee om binne 30 dae ʼn geskrewe verskoning te publiseer wat aan alle Suid-Afrikaners gerig is en waarin hy bevestig dat sy uitlatings haatspraak was, dat dit verkeerd was en dat hy dit nie weer sal doen nie.

Khumalo het die naweek ʼn verklaring uitgereik waarin hy onvoorwaardelik om verskoning gevra het aan die hele land vir die uitlatings wat hy op 4 Januarie 2016 op Facebook gemaak het.

“Ek erken dat my uitlatings kwetsend was, nie net vir wit mense nie maar ook vir swart mense. My kommentaar was verkeerd, en ek onderneem om dit nie weer in privaat of openbare ruimtes uit te spreek nie.”

Khumalo het gesê hy aanvaar die gelykheidshof se uitspraak dat sy uitlatings op haatspraak neergekom het. “In my voorleggings aan die gelykheidshof het ek die konteks beskryf waarin die kommentaar gelewer is. Ek het verduidelik dat ek reageer het op haatlike opmerkings wat aanlyn deur Penny Sparrow gemaak is, en diegene wat met haar gesimpatiseer het. Toe ek die opmerkings gemaak het, was ek self aan haatspraak onderwerp, waaronder opmerkings deur wit mense, wat Penny Sparrow se siening bevestig het dat swart mense ‘ape’ is, dat ons onrein is en dit nie verdien om op openbare strande toegelaat te word nie.”

velaphi-khumalo-facebook-post

‘n Skermskoot van Velaphi Khumalo se Facebook-kommentaar. Foto: Verskaf

Volgens Khumalo het daardie opmerkings hom kwaad gemaak. “Ek het reageer op iets wat iemand aan my gedoen het deur dieselfde ding aan hulle te doen. Ek aanvaar dat ek verkeerd was om dit te doen. Ek wou niemand leed aandoen nie. Ek het seer gehad en was kwaad.”

Khumalo het gesê hy het ook in die gelykheidshof aangevoer dat sy woede, die feit dat hy reageer het op kwetsende uitlatings en die daaglikse rassisme waaraan hy as swart man onderwerp word aan enige redelike waarnemer sou aandui dat hy geen skade bedoel het nie.

“Ek aanvaar die gelykheidshof se beslissing dat dit wat ek bedoel het nie saak maak nie, maar of die uitlatings redelikerwys verstaan sou word met die bedoeling om skade aan te rig aan nasiebou en wit mense. Dit is duidelik dat my opmerkings redelikerwys dié interpretasie tot gevolg gehad het.

“Ek vra onvoorwaardelik om verskoning en aanvaar dat die opmerkings haatspraak was soos deur die gelykheidshof in sy uitspraak gedefinieer is. Gegewe my respek vir die oppergesag van die reg en my wens om te boet vir my kommentaar, sal ek nie die beslissing van die gelykheidshof uitdaag nie.”

Die gelykheidshof het in sy uitspraak ook gelas dat ʼn afskrif van die dossier en Khumalo se uitspraak aan die nasionale direkteur van openbare vervolging gestuur word om te besluit of Khumalo strafregtelik vervolg moet word. Khumalo is ook beveel om die Menseregtekommissie (MRK) se regskoste in die saak te betaal.

‘n Skermskoot van Velaphi Khumalo se Facebook-kommentaar. Foto: Verskaf

Die ANC het Khumalo reeds in 2016 voor die gelykheidshof gedaag vir haatspraak en onbillike diskriminasie. Khumalo is gevolglik ʼn boete van R30 000 opgelê en moes gemeenskapsdiens verrig. Die MRK het egter gevoel dié straf is nie swaar genoeg nie, waarna die kommissie Khumalo weer voor die gelykheidshof gedaag het.

Khumalo het in Januarie 2016 in reaksie op die Penny Sparrow-debakel op sy Facebook-blad gesê dat hy “die land van wit mense wil reinig” en dat daar teen wit mense opgetree moet word soos Adolf Hitler met die Jode gemaak het. Hy het in ’n tweede inskrywing op Facebook gesê wit mense in Suid-Afrika verdien om soos Jode opgekap en doodgemaak te word.

Khumalo werk steeds vir die departement van sport, kuns, kultuur en ontspanning, en het ná ʼn interne ondersoek oor die aangeleentheid deur die departement ʼn finale geskrewe waarskuwing ontvang.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

108 Kommentare

jongste oudste gewildste
Willehond

Twee jaar tronk toe nes Penny? Of hoe werk dit dan nou?

Pieterv

Nee Willehond, hy het dan só mooi om verskoning gevra.
Die volgende wat ons van hom hoor is hy die EFF se hoof van kommunikasie.

Gatvol

Ek is seker daarvan hy is “onvoorwaardelik jammer”, wat `n grap!!!!

RG

Jou verskoning word aanvaar, en jy is vergewe.

Belaglik

Sy kommentaar is veel erger en wys meer haat as Penny sin. Sy sit in die tronk en hy hoef net jammer te sê….